Шинийн нэгэнд зам тээврийн ослын улмаас нийслэлд нэг хүн амиа алджээ

Тээврийн цагдаагийн алба хаагчид шуурхай ажилласны үр дүнд хэргийн газрыг орхиж явсан жолоочийг оллоо гэж дөнгөж сая мэдээллээ.

"Одоогоор хэргийг шалгах ажиллагаа явагдаж байна" гэв.

Шинийн нэгний өдөр /2020.02.24./ нийслэлд зам тээврийн ослын улмаас нэг хүн гэмтэж бэртэж, нэг хүн амиа алджээ.

Ослын тухайд тодруулбал 2020.02.24-ний 21:10 цагийн орчимд Баянгол дүүргийн 10 дугаар хорооны нутаг дэвсгэр Зүүн нарангийн гудамжинд марк, улсын дугаар тодорхойгүй автомашины жолооч нь явган зорчигч 41 настай, эрэгтэй О мөргөж гэмтээн хэргийн газрыг орхиж явсан байна. Явган зорчигч нь ГССҮТ-д эмчлэгдэж байгаад нас баржээ.

Тухайн хэргийг илрүүлэх чиглэлээр Тээврийн цагдаагийн алба хаагчид ажиллаж байна.

Зам тээврийн хэрэг, осол санамсар, болгоомжгүй үйлдэгддэг боловч гэмтсэн иргэд тусламж үзүүлээгүй, ослын газрыг орхиж явсан үйлдэл нь хэргийг хүндрүүлэх нөхцөл байдал болдог гэдгийг анхаарч үүргээ ухамсарлаж, замын хөдөлгөөний дүрмээ биелүүлж хөдөлгөөнд оролцохыг иргэд, жолооч нарт анхааруулж байна. 

Мөн өчигдөр согтуугаар тээврийн хэрэгсэл жолоодсон 7 жолоочийг илрүүлж хуулийн дагуу хариуцлага тооцсон байна.  

Согтуугаар тээврийн хэрэгсэл жолоодож зам тээврийн осол гаргасан хоёр зөрчил бүртгэгджээ.

Тууш замын болон 21 аймаг, нийслэл хотоос орох, гарах тээврийн хэрэгслийн хөдөлгөөнийг Улсын онцгой комиссын шийдвэрээр 2020.02.23-ны өглөөний 08:00 цагаас 2020.02.27-ны өглөөний 08:00 цаг хүртэл бүрэн хориглосон.

Иймд ард иргэд та бүхэн батлагдаагүй зам, замгүй хэсгээр уул, ус, хад асгатай газраар зорчиж өөрийн болон бусдын амь нас, эрүүл мэндэд аюул, занал учруулахгүй гэдэгт бид итгэж байна гэж Тээврийн цагдаагийн албанаас мэдээллээ.