ЭМЯ: Амралт сувиллын газрыг тусгаарлах байр болгоно

Эрүүл мэндийн яам covid-19 вирусийн дэгдэлттэй холбоотой нөхцөл байдлын мэдээллийг өчигдөр /2020.02.24/18.40 цагийн үед хүргэжээ. Тус яамны мэдээлснээр дэлхийн улс орнуудад тархаж буй вирусийн халдвар тархвар судлал нь тодорхойгүй байна.

БНСУ-ын Дэгү, Бусан хотод Монгол Улсын хоёр иргэнээс коронавирусийн сэжигтэй тохиолдол илэрсэн ч, шинжилгээний хариу нь сөрөг гарчээ.

Мөн өчигдөр Улсын онцгой комиссын хуралдаанаас гаргасан шийдвэрүүдтэй холбогдуулан аймаг нийслэлийн Засаг дарга нарт амралт сувиллын газрыг тусгаарлах байр болгож, халдварын голомтоос ирсэн иргэдийг тусгаарлаж ажиглалтад байлгах шийдвэр гаргасан гэдгийг тодотголоо.

Коронавирусийн халдвар нь шинж тэмдэггүй болж буй нь халдвар богино хугацаанд тархах эрсдлийг бүрдүүлж байгаа нь аюулын харанга дэлдэх болсныг сэрэмжлүүлээ. Иймд гаднын улс орнуудад зорчиж эх орондоо ирж буй монголчууд дор бүрнээ хариуцлагатай байж, өөрийгөө 14 хоног тусгаарлан ажиглах, хүн бүр дархлаагаа дэмжиж ариун цэврээ сахихыг уриаллаа.