БНСУ-д 1146 хүн халдвар авч, 11 хүн нас баржээ

Шинэ төрлийн коронавирус хурдацтай тархаж буй Өмнөд Солонгос улсад нэг хоногийн дотор халдвар авсан хүний тоо 169-өөр нэмэгдэж, 1146 болсон байна. Мөн нас барсан хүний тоо 11 болжээ. Энэ нь өнөөдөр өглөөний /2020.02.26/ 09.00 цагийн үед гаргасан мэдээлэл юм.

Нас барсан 11 дэх тохиолдол, мөн коронавирусийн улмаас нас барсан анхны гадаадын иргэн нь тус улсад элэг солиулах мэс засалд орохоор очоод халдвар авсан 35 настай монгол иргэн болохыг мэдээлсэн.

Монгол иргэний хувьд анх ирэхдээ биеийн байдал нь маш хүнд, бөөрний үйл ажиллагаа нь бүрэн алдагдсан, элэгний өвчлөл нь ч эцсийн шатандаа орсон байсан тул хагалгаа хийлгэх боломжгүй гэх хариу сонсч, эмч нар ар гэрийнхэнд нь өвчтөнтэй салах ёс гүйцэтгэхийг зөвлөсөн байна.

Өвчтөн нас барахынхаа өмнөх өдөр коронавирусийн халдвар авсан нь тогтоогдож, маргааш нь нас барсан гэх мэдээлэл бий ч өвчтөний нас барсан шалтгааныг тогтоогоогүй байгаа аж.

БНСУ-д шинээр халдвар авсан 169 хүний 134 нь Тэгү хотод, 19 нь Гёнбук хотод, 8 нь Бусанд, 4 нь Сөүлд, 2 нь Гённамд, 1 нь Инчёнд амьдардаг иргэд ажээ.

Эх сурвалж: NEWS.JOIN.COM, CHEMICALNEWS.CO.KR