БНСУ-аас ОХУ-аар дамжин ирсэн гурван иргэнийг тусгаарлажээ

БНСУ-аас ОХУ-аар дамжин ирж Улаан-Үүд хотод байрлаж байсан Монгол Улсын 11 иргэнийг өчигдөр /2020.02.27/ эх оронд нь шилжүүлэн авчирсан. Сүхбаатар боомт дахь Хилийн мэргэжлийн хяналтын албаныхан Инчеон-Иркутск чиглэлийн нислэгээр ирсэн зорчигчдыг хил нэвтрэх үед анхан шатны үзлэг хийжээ.

Энэ үеэр шинэ коронавирусийн өвчлөл гарсан Сувон хотоос ирсэн гэх өгүүлэмжтэй гурван иргэнийг нарийвчилсан үзлэг шинжилгээнд хамруулахаар Сэлэнгэ аймгийн Нэгдсэн эмнэлэгт шилжүүлжээ. Бусад найман иргэн, тээврийн жолооч, Зоонозын өвчин судлалын төвийн эмч, нийт 10 иргэнийг Алтанбулаг боомтын тусгаарлах бүсэд шилжүүлэн тусгаарлах арга хэмжээг авсан байна. Одоогоор иргэдийн эрүүл мэндийн байдал хэвийн байгаа юм байна.

Мөн Япон улсаасөчигдөр /2020.02.27/ 18:30 цагт Буянт-Ухаа боомтод газардсан Токио-Улаанбаатар чиглэлийн сүүлийн нислэг болох ОМ-502 дугаартай онгоцоор ирсэн 38 Монгол иргэнийг ХӨСҮТ-д тусгаарлалаа. Нийтдээ тус нислэгээр 230 гаруй Монгол иргэн зорчиж ирснээс БНСУ-аас ирсэн иргэдийг эрсдэлтэй бүс нутгаас ирсэн гэж үзэн, тусгаарлах арга хэмжээ аваад байна.