МОНГОЛЧУУД НЭГ ӨДРИЙН ДОТОР 11 МЯНГА ОРЧИМ ХОНЬ ХАНДИВЛАВ

Монгол Улсын Ерөнхийлөгч Х.Баттулга /2020.02.27/ БНХАУ-д ажлын айлчлал хийх үеэрээ 30 мянган хонь хандивлахаа амласан юм. Коронавирүсийн халдвар БНХАУ-аас анхлан дэгдсэнээс үүдэж, тус улсад хорио тогтоогоод буй. Ийм эрсдэлтэй үеэр Ерөнхийлөгч Х.Баттулга тус улсад айлчилсан нь олон улсын анхаарлыг татсан билээ.

Одоогоор Ерөнхийлөгч Х.Баттулга сайд нарын хоёрдугаар эмнэлэгт тусгаарлагдаад буй.  Тэгвэл энэ өдрүүдэд Ерөнхийлөгч Х.Баттулгын БНХАУ-д хүргүүлэхээр амласан 30 мянган хонийг цуглуулах сайн дурын аян эхлээд байна.

Өчигдөр оройны /2020.02.28/ байдлаар,

Баянхонгор аймаг: 2000

Увс аймаг: 1000,

Булган аймаг: 1500,

Булганы Ардчилсан нам 1500,

Говь-Алтай аймаг: 1111

Баян-Өлгий аймаг: 1080

УИХ-ын гишүүн Б.Наранхүү: 2000

Иргэдээс: 800 орчим хонийг бэлэглэхээ амлаад байна.

Дээрх тооцоогоор, нийт 11 мянга орчим хонийг сайн дурын хандиваар бүрдүүлэх нөхцөл бүрдсэн гэсэн үг юм.

ДАВАЛГААНД ОЛОН ХОНЬТОЙ УЛСТӨРЧДИЙГ НЭГДЭХИЙГ УРИАЛАВ

Энгийн малчин иргэд  урд хөршид өгөх хандивын аянд сайн дураараа нэгдсэн нь монголчуудын сайхан сэтгэлийн нэгэн илэрхийлэл болж байна. Сошиал орчинд гэнэт сайн дураараа өрнөж эхэлсэн уг аянг “Хонь ажиллагаа” хэмээн өхөөрдөн нэрлэж буй юм.

Улмаар хөрөнгө орлогын мэдүүлэгтээ хоньтой гэдгээ мэдүүлсэн улстөрчдийг хандивын аянд нэгдэхийг уриалсаар байна. УИХ-ын гишүүдээс, Б.Бат-Эрдэнэ 3300, С.Бямбацогт 1196, Б.Энх-Амгалан 650, Л.Энхболд 530, Х.Нямбаатар 480, Б.Жавхлан, Ч.Улаан Ж.Батзандан нар  300 хоньтойгоор  хонь олонтой улстөрчдийг тэргүүлж байна.

Хамгийн гол нь, хэн ч хандивын аян өрнүүлье гэж анхлан дуугарч, бусдаа уриалаагүй. Гэнэт л тал талаасаа Ерөнхийлөгчийн БНХАУ-д хүргүүлэхээр амласан 30 мянган хонинд өөрсдийн сайн дураар хандив өргөж эхэлсэн. Энэ эрчээрээ бол өнөө, маргаашдаа 30 мянган хонины тоо бүрдэхээр байгаа юм.