ЭМЯ: Тусгаарлагдсан хүмүүс халуунаа хэмжүүлэхгүй гэсэн зөрчил илэрч байна

Эрүүл мэндийн яам шинэ төрлийн коронавирусийн дэгдэлтийн талаарх ээлжит мэдээллээ хийж байна

ЭМЯ-ны хэлтсийн дарга Д.Нарангэрэл: Шинэ төрлийн коронавирусийн халдвар дэлхийн 55 оронд дэгдээд байна. ДЭМБ-ын ерөнхий захирал коронавирус маш ноцтой түвшинд хүрсэн гэдгийг мэдэгдсэн. Манай улс ДЭМБ-ын Ази, Номхон далайн бүсийн 37 орнуудын эрүүл мэндийн сайд нарын теле хурал өчигдөр /2020.02.28/болсон. Энэ хурлын үеэр Монгол Улс авч буй арга хэмжээгээ танилцуулсан бөгөөд хамгаалах хувцас, хэрэгсэл, нэмэлт оношлуур манай улсад хэрэгцээтэй байгаа талаарх мэдээллээ ДЭМБ-т өгсөн. Үүнээс гадна, ДЭМБ-ын зүгээс covid-19-ийг шинэ аюул, дэлхийн шинжлэх ухаанд мэдэхгүй зүйл маш их байна, тодорхойгүй зүйл маш их байгаа талаар хэлсэн.

Covid-19 тархалтаас урьдчилан сэргийлэхэд дэлхийн улс орнууд эв нэгдэлтэй хамтдаа тэмцэх ёстой хэрэгтэй гэдгийг анхааруулав. Коронавирусийн халдвараар хууч өвчтэй, дархлаа сул, өндөр настай хүмүүс өртөх эрсдэлтэй байгаа тул анхаарал маш сайн тавих нь чухал. Эрсдэлтэй бүлэгт орж байгаа хүмүүс олон нийтийн газраас явахгүй байх, эмээ тогтмол уух, сайн унтаж амрах, давс багатай хоол хүнс хэрэглэх, бие тавгүйрвэл 103 болон харьяа дүүргийнхээ эмнэлэгт хандах хэрэгтэй.

ДЭМБ-ын ажилтан. О.Ариунтуяа:  ДЭМБ мэдээгээр, 83 мянга 694 батлагдаж 2861 нас баралт бүртгэгдэв. Сүүлийн 24 цагийн байдлаар Шинэ Зеланд Азербайжан Нидерланд зэрэг улс бүртгэгдэв. 21 улс орон дотооддоо дэгдэлт байдлаар тархаж байна. Ялангуяа Солонгос, Итали, Иранд их тархаж байна. Сүүлийн гурван хоногт шинээр халдвар бүртгэгдсэн оронд гаднаас импортлогдож орж ирсэн байгаа. ДЭМБ өмнө нь Хятадад тархах эрсдэл өндөр гэж үнэлж байсан бол энэ удаад дэлхий нийтэд тархах эрсдэл маш өндөр гэж үнэлсэн. Ази, Номхон далайн бүс нутаг маш эгзэгтэй түвшинд хүрээд байна Одоогийн баримталж буй бодлогоо өөрчилж, есөн гол тэргүүлэх чиглэлд зөвлөмж гаргаж, танилцуулсан.

ЭМЯ-ны Эмнэлгийн тусламжийн газрын дарга Я.Буянжаргал: Дэлхийн 55 улсад халдвар бүртгэгдэж, нийт 85 мянга 220 халдвар илрээд байгаа эрсдэл ихтэй энэ үед бид үйл ажиллагаагаа улам сайжруулан ажиллах хэрэгтэйг сануулж байна. Монгол Улсад коронавирусийн халдвар бүртгэгдээгүй. Одоогийн байдлаар бид 351 сэжигтэй тохиолдлыг тусгаарлалтад авч ажиглалт хийж байна.

Эрүүл мэндийн яам, Гадаад хэргийн яамтай хамтраад ОХУ-ын талтай цахим уулзалтыг зохион байгуулсан. Мөн ОХУ-аас түргэвчилсэн оношлуурыг авах, ОХУ-ын эмчилгээ оношлоогооны явцтай танилцах багийн гишүүдийг урьдчилан томилсон. ЭМЯ болон аймаг нийслэлийн газрууд нэмэлтээр тусгаарлах байрыг судалж байна.

Ажиглалтад байгаа иргэдэд эмнэлгийн тусламж үйлчилгээнд хүндрэл учруулахгүй байх талаар мэдээлж сануулж байгаа. Гэвч иргэдийн зүгээс тусламж үйлчилгээнд хүндрэл учруулах явдал байсаар байна.

Шаардлага гарсан тохиолдолд ариутгал халдваргүйтлийн зөвшөөрөлтэй байгууллагуудыг ашиглана. Одоогийн байдлаар хамтарч ажиллах хүсэлт гаргасан хувийн хэвшлийн байгууллагууд ирж байна. Нэмэлтээр гаргах байруудыг бид судалж байгаад ажиглалт хийх эсэхийг шийднэ.

“Сонгдо” эмнэлэгт өчигдөр /2020.02.28/ сэжигтэй тохиолдол орж ирсэн гэх мэдээлэл авсан. Тус эмнэлэг өвчтөнийг шууд тусгаарласан бөгөөд мөн үйлчилгээ үзүүлсэн орчныг нь бас тусгаарласан. ХӨСҮТ-ийн мэргэжлийн баг ажиллаад ХӨСҮТ-д тухайн хүнийг тусгаарласан. Одоогоор тухайн иргэний биеийн байдал хэвийн үе ханиалгаж халуураагүй байна.

Жаргалантын аман дах сувилалд байгаа БНСУ-ын Дэгү, Пусан чиглэлээс ирсэн 17 иргэн бий. Дээрх иргэд өчигдөр /2020.02.28/ халуунаа хэмжүүлэхгүй гэсэн зөрчил гаргасан. Бид цагдаагийн байгууллагад мэдээлсэн. Энэ үйл ажиллагаанд бусдыгаа турхирсан иргэнийг олж тогтоосон. Тиймээс тусгаарлалтад байгаа иргэдийг иргэний хариуцлагаа ухамсарлах хэрэгтэйг сануулж байна. Тухайн иргэд иргэний эрх ярихаас илүүтэй хариуцлага гэдгийг ойлгох хэрэгтэй байгаа юм.

Цэргийн төв эмнэлэгт тусгаарлагдаж байгаа хүмүүсээс тусгай шүршүүр шаардаж, мэргэжлийн эмч нарт үзүүлэхгүй үйлдлүүд гаргаж байгаа иргэд бий. Монголын эмч эмнэлгийн мэргэжилтнүүд тахлын үед, сарсын үед ажиллаж байсан маш өндөр туршлагатай эмч нар байдаг.

Тиймээс өөрт нь болоод ар гэрт нь тусламж үзүүлэх гээд явж байгаа тангараг өргөсөн эмч эмнэлгийн мэргэжилтнүүдийг эсэргүүцэж, доромжлох шаардлага байхгүй. Хэрвээ ийм байдал дахиж гарвал хуулийн дагуу хариуцлага яригдах болно.