Иранд коронавирусийн халдвараар 210 хүн нас барсан тухай албан бус эх сурвалж мэдээлжээ

Шинэ коронавирусийн халдварын улмаас доод тал нь 210 хүн нас барсан тухай Ираны эрүүлийг хамгаалах байгууллагын эх сурвалж BBC Persian сувагт мэдээлжээ.

Эндэгдлийн ихэнх нь нийслэл Тегеран болон шашин мөргөлийн ариун хот Комд гарсан гэнэ. Энэ тоо нь Ираны эрх баригчдын өгч байгаа албан ёсны тооноос (34) зургаа дахин өндөр байгаа юм.

Дээрх мэдээллийг тарсны дараа Ираны засгийн газрын төлөөлөгч Кянуш Жаханпур бодит тоо баримтыг эрх баригчид нуун дарагдуулаагүй гэж мэдэгдээд BBC сувгийг худал мэдээ тараасан гэж буруутгажээ.

Саяхан Covid-19 вирус анх тархсан Ком хотыг төлөөлдөг Ираны парламентын гишүүн эрх баригчдыг бодит тоо баримтыг нууж байна гэж ил тод шүүмжилсэн юм.

Өчигдөр бас АНУ-ын төрийн нарийн бичгийн дарга Майк Помпео конгрессийн байнгын хороонд мэдээлэл өгөх үеэрээ “Бид Исламын Бүгд Найрамдах Иран улсад тусламж үзүүлэх санал тавьсан. Тус улсын эрүүлийг хамгаалах систем сул хөгжсөнөөс гадна бодит мэдээллийг бусадтай ил тод хуваалцах тал дээр хойрго хандаж байна” гэж мэдэгджээ.

Харин Иран улсын гадаад хэргийн яамны хэвлэлийн төлөөлөгч Аббас Мусави “Манай улсын эсрэг эдийн засгийн терроризм явуулж, эм, эмнэлгийн бүтээгдэхүүн гаднаас авах боломжийг хүртэл хааж буй улс тусламж санал болгож байгаа нь инээдтэй хэрэг бөгөөд сэтгэл зүйн тоглоом төдий зүйл” гэж мэдэгдсэн байна.

Саяхан Иран улс нийслэл Тегеран болон бусад 22 хотод Баасан гарагийн мөргөл явуулахыг хориглож, сургуулиудыг хаажээ.

Ираны чиглэлийн олон нислэг цуцлагдаж, хөрш улсууд нь хилээ хаасны улмаас тус улсын олон мянган иргэн хилийн гадна түгжигдээд байна.

Дэлхийн Эрүүл Мэндийн Байгууллагын мэргэжилтнүүд маргааш буюу Ням гарагт Иранд очиж, нөхцөл байдалтай танилцахаар болжээ.

Тэднийг Иранд очих арга зам хязгаарлагдмал байгаагийн улмаас хугацаа хойшилж, эцэст нь Арабын Нэгдсэн Эмират улс туслахаар болсон байна.

Коронавирусийн халдвар Иран улсаас Афганистан, Бахрейн, Кувейт, Оман, Пакистан, Ирак зэрэг арав гаруй хөрш улсад нь тархаад байгаа юм.

Эх сурвалж: BBC