Шинчонжи сүмийг үндэслэгч өвдөг сөгдөн уучлалт гуйлаа

Өмнөд Солонгост шинэ төрлийн коронавирус хурдацтай тархах болсон нь тус улсад үйл ажиллагаа явуулдаг “Шинчонжи” Христийн сүмтэй холбоотой хэмээн албаныхан үзэж байна. Иймд тус сүмийг үндэслэгч Ли Ман Хи гэгчийг халдварт өвчинтэй тэмцэх Засгийн газрын үйл ажиллагаанд саад учруулж, тоо баримтаа нуун дарагдуулж, олон нийтийн эрүүл мэндэд заналхийлсэн хэрэгт буруутган эрүүгийн хэрэг үүсгэсэн тухай өнөөдөр /2020.03.02/ мэдээлсэн билээ.

Үүний дараа пастор Ли Ман Хи хэвлэлийн хурал зарлаж, Өмнөд Солонгосын ард иргэдээс өвдөг сөгдөн уучлалт гуйжээ.

Өдгөө 89 настай тэрбээр “Би өөрийн зүгээс болон сүмийнхээ нийт гишүүдийн өмнөөс хүлцэл өчиж байна. Мэдээж энэ бүхэн санаатай үйлдэл байгаагүй. Ийм олон хүнд халдвар тархана ч гэж төсөөлөөгүй. Бид маш их хичээсэн ч урьдчилан сэргийлж чадсангүй. Засгийн газар халдварт өвчний тархалтын эсрэг маш их хүчин чармайлт гарган ажиллаж байгаад талархаж байгаа. Цаашид халдварын цар хүрээг бууруулахын төлөө эрх баригчидтай хамтран ажиллаж, хүн хүч болон эд материалын дэмжлэг үзүүлэх болно” хэмээн хэлжээ.