Сайд, дарга нарын цалинг дахин нэмсэн гэв үү

-МАН-ынхан төрөөс хулгай хийх сэтгэл нь ханахаа байжээ-

Өнөөгийн төрийн эрхийг атгаж буй хүмүүст ичих нүүр байтугай булчирхай ч үгүй бололтой. ЖДҮХС, ХЭДС, Мал хамгаалах сан гээд хамаг зээл, тусламжийг шүүрдэнэ. Тендер, төслүүдийн “өрөм”-ийг хамчихна. Гэтэл байтлаа цалингаа хүртэл “гэрлийн хурдаар” нэмжээ. Тэдэнд ер нь авахгүй, хүрэхгүй мөнгө гэж алга.

Уг нь төр, засгаас Ковид-19 вирусын тархалтаас урьдчилан сэргийлэх зорилгоор авч хэрэгжүүлж буй арга хэмжээг олон нийт дэмжсээр ирсэн. Бүр саяхнаас цаг наргүй ажиллаж байгаа эрүүл мэндийн салбарынхан болон онцгой байдлынханд зориулан иргэд, аж ахуйн нэгжүүд эрвийх, дэрвийхээрэ хандив цуглуулан өгч байна. Иргэд нь ийн сэтгэл гаргаж байхад Засгийн газрын гишүүд нь цалингаа хэд дахин нэмүүлж, өөрсдийгөө бөмбийлөөд сууж байгаа бололтой.

Уг нь 2019 оны арванхоёрдугаар сарын 25-ны өдрийн Засгийн газрын хуралдаанаас 472 тоот тогтоолоор Төрийн албөн хаагчийн албан тушаалын цалингийн сүлжээ, хэмжээг шинэчлэн тогтоосон. Тогтоолд энэ оны эхний өдрөөс мөрдөж ажиллах тухай ч заасан байдаг. 

Гэтэл Ковид-19-ийн халдвар, өндөржүүлсэн бэлэн байдлын зэрэг, сар шиний баярыг тэмдэглэх эсэх хэмээн олон нийтийн анхаарал өөр зүйлсэд төвлөрсөн байх үеийг ашиглан дээрх тогтоолд өөрчлөлт оруулжээ. Тодруулбал, хоёрдугаар сарын 19-ний өдрийн Засгийн газрын хуралдаанаар 75 дугаар тогтоол гээчийг баталж, түүндээ Засгийн газрын гишүүдийнхээ цалинг дахин нэмэгдүүлэх тухай заасан байгаа юм. Үндсэндээ өмнөхөөс сар гаруйханы дараа гэсэн үг шүү дээ. 

Ёстой л “үүрэхийг та нар үүрч, аахилахыг нь бид аахилъя” гэсэн шиг “галын цэг дээр” ажилладаг энгийн иргэдээ цөөнхөн хэдэн төгрөгөөр хуурч, өөрсдийнхөө цалинг хэд дахин нэмэгдүүлсэн нь ёсзүйтэй үйлдэл мөн гэж үү. Төрийн данснаас авч байвал сэтгэл нь амардаг хүмүүс гэлтэй. Эрт цагийн явган ярианд “Нэг хулгайч нөхөр ганцаараа хээр явж байгаад унтах болж. Гэтэл хулгай л хийхгүй бол нойр нь хүрэхгүй байна гэнэ. Тэгмэгц мань хүн босмогцоо ганц ширхэг шүдэнз халааснаасаа авч дэрэн доогуураа хийгээд нам унтсан” хэмээдэг. Хөөрхий хулгай хийсэн болж өөрийгөө хуураад сэтгэл нь тайвширсан юмуу даа.

Үүнтэй адил МАН-ынхан төрийн сангуудаас хулгайлж байснаа эцэст нь өөрсдийн цалингаа нэмж, хөлжих ч гэж дээ.

Эх сурвалж: Erennews