ЭМЯ: Шинэ коронавирус туссан хүнтэй хамт 16 монгол иргэн олон улсын хуралд оролцоод ирсэн байна

Өнөөдөр /2020.03.08/ ЭМЯ-наас шинэ коронавирусийн асуудлаар цаг үеийн ээлжит мэдээлэл өглөө. Энэ үеэр тус яамны Тандалт судалгааны албаны дарга Л.Амбасэлмаа,

“Гуравдугаар сарын 6-нд ХӨСҮТ-д тусгаарлаж үзлэг, шинжилгээ хийсэн гурван хүнээс вирус илрээгүй. 7-ны өдөр мөн гурван тохиолдлыг тусгаарласан, шинжилгээний хариу гараагүй байна. 

Бид нэгдүгээр сарын 9-нөөс хойш иргэдэд халдвар тархсан газар орон руу зорчихгүй байх заавар зөвлөмжийг өгч буй. Гэсэн ч үүнийг мөрдөхгүй, эрсдэлт нөхцөл байдал үүсгэх иргэд цөөнгүй байна.

Жишээ нь, 24 монгол иргэн өнгөрөгч хоёрдугаар сарын сүүлээр АНУ-ын Лас Вегас хотод Дэлхийн үл хөдлөх хөрөнгийн форумд оролцсон байна. Уг форумд дэлхийн 60 гаруй орны, зургаан мянга гаруй хүн хамрагдсан. Тэдний дотор шинэ коронавирус туссан канад иргэн байсан нь батлагдсан.

Форумд оролцсон 24 иргэний 16 нь одоогоор Монголд ирээд байгаа. Тэднийг тусгаарлан, ажиглаж байна. Тэднийг халдвар тархсан оронд зорчоод ирсэн гэдэг утгаар нь тусгаарласан, олон улсын хуралд оролцсоныг нь мэдээгүй. Өөрсдөө энэ тухайгаа хэлээгүй. 

Одоо найман иргэн нь ирээгүй байна. Тэднийг ирүүт мөн тусгаарлах арга хэмжээ авна.

Тус форумын зохион байгуулагчдын зүгээс, шинэ коронавирусээр халдварласан хүн оролцсон тул иргэддээ анхаараарай гэсэн албан бичиг ирсэн” гэлээ.