Ө.Энхтүвшин: Тусгаарлагдаж буй иргэд архи ууж, хоолоо голж, “Эндээс гаръя” хэмээн бусдыгаа уриалж байна

Өнөөдөр /2020.03.08/ Улсын онцгой комисс ес дэх удаагаа хуралдаж, шинэ коронавирусийн халдвараас урьдчилан сэргийлэх ажлын хүрээнд холбогдох шийдвэрүүдийг гаргалаа. Хуралдааны шийдвэрийг танилцуулахын эхэнд УОК-ын дарга, Шадар сайд Ө.Энхтүвшин иргэдэд Олон улсын эмэгтэйчүүдийн өдрийн мэндийг дэвшүүлсэн юм. Үргэлжлүүлээд,

“Байдал амаргүй хэвээр байна. Өнөөдрийн байдлаар халдвар 99 улсад тархсан байна. Өвчилсөн хүний тоо улам бүр нэмэгдсээр байна. Иймд бидэнд өчүүхэн ч тайвшрах шалтгаан байхгүй. Улам чамбай, сонор сэрэмжтэй ажиллах шаардлага тулгарч байна.

Иргэдийг гадны орон руу зорчих ажлаа түр хойшлуулаач гэж хүсмээр байна. Халдвар гараагүй байлаа ч гадны орон руу зорчих нь өндөр эрсдлийг дагуулж байна. Зорчоод ирсэн бол өөрсдийгөө гэртээ 14 хоног тусгаарлах зайлшгүй шаардлагатайг үүгээр анхааруулж байна. 

Манай иргэд төр засгийн шийдвэрийг сайтар даган биелүүлж байгаа. Гэхдээ зориуд анхааруулж хэлэх хэд хэдэн зүйлс тусгаарлалтын байранд гарч байна.

“Эндээс гаръя” гэж уриалж байна. Хоолоо голж байна, архи ууж байна. Бусдын өрөө рүү орохыг оролдож байна. Тусгаарлагдаж буй иргэд ийм зөрчил үүсгэж байна. Үүсээд буй хүнд үед эв нэгдэл, хариуцлага, сахилга, эмх цэгцээ хангах хэрэгтэй гэдгийг анхааруулъя. Иргэд ч бас зөрчил гаргаж буй хүмүүст шаардлага тавьж байх хэрэгтэй. Үүний цаана маш том эрсдэл нуугдаж байгаа шүү гэдгийг хэлмээр байна” гэлээ.