ХӨСҮТ: “Remax” компанийн 16 хүний шинжилгээний хариу СӨРӨГ гарсан

Эрүүл мэндийн яамнаас ээлжит мэдээллээ хийлээ.

Энэ үеэр ЭМЯ-ны хэлтсийн дарга Д.Нарангэрэл “Сүүлийн 14 хоног тархвар судлалын судалгаагаар халдвар авагсдын 60 гаруй хувь нь өвчлөл гарсан улс руу аялсан байна.Тухайлбал, Тайландын 16 иргэнээс халдвар илэрсэн байна.Энэ нь аялал жуулчлалаас үүдсэн байна.Иймд халдвар гарсан улс орон руу зорчихгүй байхыг уриалж байна” гэлээ.

105 УЛСАД ХАЛДВАР БҮРТГЭГДСЭН

ДЭМБ-ын мэргэжилтэн О.Ариунтуяа дараах мэдээллийг өгөв.

ДЭМБ-аас 105 улсад 105586 хүн халдвар авч, 30584 хүн нас баржээ. Халдварын тархалт 24 цагийн хугацааанд 1000 гаруйгаар нэмэгдсэн хоёр улс байгаа нь Иран, Итали улс юм. Италид 133 хүн нас барж, нас баралтын тоо 366-д хүрсэн. Харин БНСУ-д халдварын тохиолдол буурч байна. 360 тохиолдол шинээр бүртгэгдэж, 19 мянган хүн шинжилгээний хариуг хүлээж байна.
ДЭМБ-аас “COVID-19” халдварын тархалтаар нь дөрвөн үе шатад хувааж үзэж байна.  Үүнд: 
1. Тохиолдол бүртгэгдээгүй
2. Нэг буюу түүнээс дээш импортлогдсон
3. Дэгдэлт голомтлон тархаж байгаа
4.Өргөн цар хүрээний тархалттай гэж хувааж, үе шат бүхэнд тохирсон зөвлөмжийг улс орнуудад өгч буйг Монгол Улс мөрдөж байна. 

Эрүүл мэндийн яамны Гадаад харилцаа, хамтын ажиллагааны хэлтсийн дарга Б.Янжмаа “Номхон далайн баруун эрэгт байгаа “Grand princess ” аяллын хөлөг онгоцыг Калифорни мужийн Оакланд хотын боомтод зогсоох шийдвэрийг тус улсын эрх баригчид гаргалаа. Уг онгоцон дээр байгаа Калифорни мужийн оршин суугчдыг боомтын ойролцоох агаарын цэргийн баазад тусгаарлахаар болсон байна. Тус мужийн 1,000 гаруй оршин суугч байгааг мэдээлсэн. Бусад мужийн иргэдийг Техас, Жеоржиа мужийн агаарын цэргийн баазад тусгаарлахаар болжээ. Харин гадаад улсын иргэдийг эх оронд нь буцааж, хөлгийн багийнхныг онгоцон дээр нь тусгаарлахаар болжээ. АНУ-д халдвар авсан нийт хүний тоо 550-д хүрээд байна. Нийт 34 муж улсад халдвар гарснаас найман мужид онц байдал зарласан бөгөөд нийтдээ 21 нас баралт бүртгэгджээ. Итали улсад сүүлийн нэг өдрийн дотор 133 хүн нас барж, нийт нас баралт 366-д хүрсэн. Шинэ халдварын тоо 25 хувиар өсөж, 7,375-д хүрсэн гэсэн мэдээлэл байна. БНСУ-д 248 шинэ халдвар бүртгэгдсэний 190 нь Дэгү хотод, 26 нь хойд Гёнсан хотод бүртгэгдсэн бол Сөүл болон бусад хотод 10 гаруй тохиолдол бүртгэгдсэн байна” гэв.

ИРГЭД ӨӨРСДӨӨ ЗАРДЛАА ТӨЛНӨ

ЭМЯ-ны Эмнэлгийн тусламжийн газрын дарга Я.Буянжаргал “Тусгаарлах байранд 511 иргэнийг ажиглалтад аваад байна. Нийт 914 хүнийг тусгаарласан. Өнөө өглөө Нурсултан-УБ чиглэлийн онгоцоор 22 иргэн ирсэн, тусгаарлагдсан хүн байхгүй. Берлин-Москва-УБ-ын онгоцоор 82 иргэн ирснээс Японоос ирсэн хоёр иргэнийг тусгаарлалаа” гэдгийг мэдэгдлээ.

ХӨСҮТ-ийн ерөнхий захирал Д.Нямхүү “ 2020.03.07-нд ХӨСҮТ-д тусгаарлагдсан гурван тохиолдлоос халдвар илрээгүй. Мөн Олон хуралд оролцсон “Reмаx” компанийн 16 хүний эхний шинжилгээнээс халдвар илрээгүй. Эдгээр хүмүүсийг үргэлжлүүлэн ажиглаж байгаа. 2020.03.08-нд хоёр сэжигтэй тохиолдлыг тусгаарлаад байна. БНХАУ-ын халдварын тоо эрс буурч байна. Тус улсын зүгээс хатуу арга хэмжээ авч, иргэд нь маш сайн хэрэгжүүлж байна. Иймд анай улсын иргэд сахилга баттай байх нь бидний ажлыг хөнгөвчлөх болно. Түүнчлэн тусгаарлагдсан иргэд өөрсдөө зардлаа төлнө гэдгийг анхааруулж байна” гэлээ.

ГХЯ-ны Консулын газрын захирал Л.Мөнхтүшиг “Япон, Солонгост манай иргэд эх орондоо буцах хүсэлтээ гаргаж байна. Солонгосын ЭСЯ-д 120 гаруй иргэн эх орондоо ирэх хүсэлт гаргасан байна. Бид хүсэлтийг УОК-т хүргүүлсэн. 3000 гаруй иргэн гуравдугаар сарын сүүлчээр Монголд зорчих тасалбараа бичүүлсэн байна. БНХАУ, Япон, БНСУ, Итали, Иран улсаас зорчигч хүлээн авахгүй. Монгол Улсын иргэн бол 14 хоног өөрийн зардлаар тусгаарлагдах журам мөрдөгдөж байгаа. Өнөөдөр тусгаарлах байрны хүрэлцээ хангалтгүй байна. Ирсэн иргэд тусгаарлах байрны журам зөрчих, төлбөрөө төлөхгүй хүндрэл учруулж байна. Япон, Солонгосоос ирэх иргэд Москва, Берлиний чиглэлийн нислэгээр ирэх боломжтой, ирээд өөрийн зардлаар 14 хоног тусгаарлагдана гэдгийг хатуу анхаарах хэрэгтэй” гэдгийг мэдэгдлээ.