Ц. ЛУВСАН: ЭРЧИМ ХҮЧНИЙ ХЭРЭГЛЭЭНИЙ ТЭЭВРИЙН ТАРИФЫГ 25 ХУВИАР НЭМЭХ ШААРДЛАГАТАЙ БАЙНА

Дулааны цахилгаан станцуудын нүүрс тээвэрлэлтийг Улаанбаатар төмөр зам компани хариуцдаг. Тээврийн тарифыг өөрчлөх боломжгүйгээр засгийн газраас тогтоодог байна. Хэт бага үнээр тээвэр хийдэг учраас Улаанбаатар төмөр зам компани жил бүр 10 тэрбум төгрөгийн алдагдал хүлээх болжээ. Санхүүгийн энэ хүндрэлийг бууруулах асуудлаар Улаанбаатар төмөр зам шинэ тооцоо судалгаа хийж эхэлсэн байна.

Улаанбаатар төмөр зам жилд 7 сая тонн эрчим хүчний хэрэглээний нүүрс тээвэрлэдэг байна. Ингэхдээ жилдээ 14 орчим тэрбум төгрөгийн алдагдлыг хүлээдэг байна. Эрчим хүчний хэрэглээнд дулааны цахилгаан станцууд руу 1 тонн нүүрсийг 1 км-т 30.5 төгрөгөөр тээвэрлэдэг байна. Харин 1 тонн км-т тээвэрлэх тээврийн өртөг нь 38.6 төгрөгт хүрчээ. Тухайлбал, Багануураас Улаанбаатар хүртэл нэг тонн нүүрсийг 7,760 төгрөгийн зардал гаргаж 6,130 төгрөгөөр тээвэрлэдэг юм байна. Ингэснээр УБТЗ тонн тутамд 1630 төгрөгийн алдагдал, жилд 10-14 тэрбум төгрөгийн алдагдалтай ажилладаг гэлээ. Энэ нь эрчим хүчний хэрэглээний  нүүрс тээврийн тарифтай холбоотой. Тарифыг нэмэх шаарлага зайлшгүй байгааг албаныхан ярьж байна.

Мөн вагоны парк шинэчлэлт хийх шаардлагатай болсныг албаныхан ярилаа. Нүүрсний тээвэрт явж байгаа нийт 1,856 вагоны насжилт өндөр байгаагаас шалтгаалж тээврээс хасагдах вагоны тоо жилээс жилд нэмэгдэж байгаа гэлээ.

УБТЗ гадаад зах зээлээс сэлбэг хэрэгслийг худалдан авах, мөн вагон зүтгүүрийн парк шинэчлэлт хийх, ХАБ-ыг найдвартай хангах, техник технологийн шинэчлэл хийх зайлшгүй шаардлагатай болсон байна. Ингэхийн тулд эрчим хүчний хэрэглээний нүүрс тээврийн тарифыг өөрийн өртөг хаах түвшинд хүргэхийн тулд тээврийн тарифыг 25 хувиар нэмэгүүлэх шаардлагатай байгаа юм байна. Ингэснээр тээврийн хөлс тонн км тутамд 7.6 төгрөгөөр нэмэгдэж өртөг хаах хувь 100.7-д хүрэхийг албаныхан ярилаа.