ОРОН ГЭРГҮЙ 299 ИРГЭНИЙГ ЭРҮҮЛ МЭНДИЙН ҮЗЛЭГТ ХАМРУУЛЖ, ТҮР БАЙРААР ХАНГАЛАА

Өчигдөр буюу 3-р сарын 13-ны өдрийн өглөөний 06:00 цагаас эхлэн нийслэлийн томоохон зах, худалдааны төв, авто вокзалууд, орц хонгил, гудамж талбайд хоноглон, тэнүүчилж амьдардаг, гэр орноосоо дайжсан архины хамааралтай 299 иргэнийг илрүүлж эрүүл мэндийн анхан шатны тусламж үзүүллээ. Учир нь дээрх иргэд эрүүл мэндээ үл анхаарч, хүйтний эрч буураагүй эдгээр өдрүүдэд гудамж талбай, орц хонгилоор хоноглох нь аливаа өвчин, вирусийн халдвараар өвчлөх өндөр эрсдэлтэй гэж албаны хүмүүс үзжээ.

Тиймээс Нийслэлийн засаг дарга гэр оронгүй иргэдийн талаар авах арга хэмжээний тухай А/345 дугаар захирамж гарган орон гэргүй иргэдийг эрүүл мэндийн үзлэгт хамруулж амьдрах түр байраар хангалаа. Тодруулбал Хан уул дүүрэгт 40 иргэн, Чингэлтэй дүүрэгт 12, Баянзүрх дүүрэгт 10 гаруй иргэнийг орон гэргүй тэнүүчлэн амьдардаг иргэдийн итгэлийг нэмэгдүүлэх, нийгэмшүүлэх, бичиг баримтжуулах, түр хоноглох байранд байршуулах үйлчилгээ үзүүлдэг ТББ-уудад хариуцууллаа. Мөн Нийгмийн хамгааллын тусгай төвд өнөөдрийн байдлаар 80 иргэнд үйлчилгээ үзүүлж байгаа бол нэмэлтээр 70 иргэнийг байршуулах боломжтой юм. Ийнхүү гэр оронгүй 300 иргэний асуудлыг Хотын дарга анхаарч тэдний халдвар хамгааллын асуудлыг шийдвэрлэлээ. Дээрх ажлыг Нийслэлийн Засаг даргын Тамгын газрын Нийгмийн бодлогын хэлтэс, Нийслэлийн Нийгмийн халамжийн газар, Нийслэлийн Цагдаагийн удирдах газар, Нийслэлийн Эрүүл мэндийн газар, Нийгмийн хамгааллын тусгай төв хамтран хийсэн байна. Орон гэргүй тэнүүчлэн амьдарч байгаа иргэдийн ар гэрээс тухайн иргэнийг авах хүсэлт гаргасан тохиолдолд ар гэрт нь буцаах, гэр оронгүй иргэдийг Нийгмийн хамгааллын тусгай төвд байршуулах, ТББ-д хүргүүлэх ажлыг цаашид зохион байгуулах юм байна.