Ж.Амгалан: Согтууруулах ундаа хэрэглэсэн хүн хамгийн ноцтой зөөвөрлөгч болох эрсдэлтэй

БНСУ-д буй монгол иргэдийг тусгай нислэгээр эх орондоо авч ирэхтэй холбогдуулан өнөөдөр ОБЕГ-аас мэдээлэл хийлээ.

Энэ үеэр сэтгүүлчид “Худалдаа үйлчилгээний газруудын архи худалдаалах байдлыг хэрхэн хяанаж байгаа вэ. Ахуйн хүрээний архидалд хэр гарч байна вэ” гэх асуулт асуусан юм.  

Эл асуултад ЦЕГ-ын Нийтийн хэв журам хамгаалах, олон нийтийн аюулгүй байдлыг хангах албаны дарга, цагдаагийн хурандаа Ж.Амгалан хариулт өглөө.

Тэрээр, “Ахуйн орчинд согтууруулах ундаа хэрэглэж зөрчил гаргасан иргэдийн тоо нэмэгдэж байна. Тиймээс архи согтууруулах ундааны зүйл худалдаалдаг ААН анхаарах хэрэгтэй байна. ААН хязгаарлаад эхлэхээр гар дээрээс худалдаалалт нэмэгддэг. Иймд хориглосон хугацаанд гар дээрээс болон бусад зөвшөөрөлгүй бүсээс архи худалдан авсан хүмүүст хатуу хариуцлага тооцно. Ийм онцгой нөхцөлд архи согтууруулах ундаа хэрэглэсэн хүн хамгийн ноцтой зөөвөрлөгч болох эрсдэлтэй. Иймд иргэд согтуу хүмүүсээс хол байх, анхаарах хэрэгтэй байна” гэлээ.