ДЭМБ ӨВЧНӨӨС ХАМГААЛЖ БУЙ МОНГОЛЫН ТУРШЛАГЫГ ДЭЛХИЙД ТАНИЛЦУУЛЛАА

Ковид-19 цар тахал дэлхий нийтийг түгшээсэн хэвээр байна. Улс орнууд нислэгээ цуцалж, бүх нийтийн хөл хорио тогтоож, онц байдлыг дээд түвшинд зарлаж эхэллээ. Ялангуяа Европ тив, тэр дундаа Итали, Испани, Франц улсууд өвчний голомт болон хувирч байна. Эдгээр улсуудад өдөрт дунджаар 90-170 хүн нас барж байгаа нь байдал улам хүндэрч байгааг харуулсаар байгаа юм. Өнөөдрийн 11 цагийн албан ёсны мэдээллээр дэлхийн 150 улсад өвчин бүртгэгдэж 24 цагийн дотор нас барсан хүний тоо 343-өөр нэмэгдлээ. Ингэснээр дэлхий дахинд коронавирусийн улмаас амиа алдсан хүний тоо 50,735 болж байна. Одоо үзэгч танд дэлхийн нийтийн нөхцөл байдлаас мэдээлэл хүргэе. 

ИТАЛИ, ИРАН, ИСПАНИ УЛСАД ӨДӨРТ ДУНДЖААР 90-170 ХҮН НАС БАРЖ БАЙНА 

Коронавирусийн цар тахал Бүгд Найрамдах Хятад Ард Улсад анх бүртгэгдсэн. Цар тахалд нэрвэгдсэн голомтын хувьд нас баралт 3.4 хувьтай байсан бол Европ тивд нас баралт 7.8 хувд хүрлээ. Ингэснээр өвчний голомт Ази тив биш Европ тив рүү шилжээд байна. Итали, Франц, Испани зэрэг улс орнуудад голомтлон тархаж  байна. Өдөрт 1000-300 шинэ тохиолдол бүртгэгдэж, 90-170 хүн нас барж байна. Тийм учраас Европ тив бүхэлдээ яаралтай арга хэмжээ авч хэрэгжүүлэх, тархалтыг таслан зогсооход бүх анхаарлаа хандуулжээ. Тухайлбал Чех, Испани, Франц, Итали Улсууд олон нийтийн арга хэмжээг хориглож, шатахуун эм эмнэлгийн хэрэгслээс бусад үйлчилгээний байгууллагуудыг хаасан байна. Мөн иргэдийг нэн шаардлагатай тохиолдолд л гэрээсээ гарахыг зөвшөөрчээ. Швейцарь улсад коронавирусийн халдвар мөн хурдацтай тархлаа. Ганцхан шөнийн дотор халдвар авсан хүний тоо 800-аар өсч 13 хүн нас барсан байна. Тийм учраас сургууль, цэцэрлэгийг 21 хоногийн хугацаанд бүрэн каринтилжээ. Францын хувьд байдал хүнд хэвээр байна. Шинэ тохиолдол 900-аар нэмэгдэж 29 хүн нас баржээ. Литва улс 15 хоногийн хугацаатай каринтин тогтоож сунгах эсэхээ тухайн цаг үеэс хамаарч шийдэхээр болж байна.  Их Британид нийтдээ 342 шинэ тохиолдол бүртгэгдэж 10 хүн нас барлаа. Энэ улстай хийх нислэгээ Америкийн Нэгдсэн Улс ирэх Даваа гарагас эхлэн зогсоох гэж байна. Цаг тахал хурдацтай халдварлаж байгаа учраас Европ тивд зан үйлээ өөрчлөх зайлшгүй шаардлага байгааг онцоллоо. Гар барих, тэврэх, үнсэх зэрэг зэргээс татгалзахыг сануулж эхэлсэн байна. 

ИТАЛИ УЛСЫН ЭРҮҮЛ МЭНДИЙН ТОГТОЛЦОО ХҮНД СОРИЛТТОЙ ТУЛЛАА 

Италийн Ломбарди мужид өвчний тархалт хурдацтай нэмэгдэж эмнэлгийн ор хүрэлцэхээ байсан байна. Одоогоор ердөө 15-20 орчим сул ор үлджээ. Өдөрт дунджаар 85 хүн эрчим эмчилгээнд орж байгаа юм. Өдөртөө 2-3 ор суларч байгааг мэдээллээ. Нөөц шавхагдаж байгаа учраас шинээр ирэх өвчтөнүүдийг хүлээн авч хэвтүүлэх боломжгүй болж байгааг Ломбарди мужийн нийгмийн хамгаалал хариуцсан ажилтан мэдэгдлээ. Энэ мужид 732 хүн эрчимт эмчилгээнд байгаа бол 76 шинэ тохиолдол сүүлийн 24 цагт бүртгэгдсэн байна. Ломбардигаас өөр бусад мужуудад өндөр настнууд амьсгалын дутагдлын улмаас нас барж эхэлжээ. Эдгээр хүмүүст эмчилгээ үйлчилгээ үзүүлэхийг хичээж байгаа ч эмнэлгийн ор, бусад нөөц хүрэлцэхгүй байгаа талаар эх сурвалжууд мэдээлсэн байна. 

АНУ-ЫН НЬЮ ЙОРК ХОТОД 1.1 САЯ ХҮҮХЭД ГЭРТЭЭ БАЙНА 

Америкийн Нэгдсэн Улсын 50 мужийн 49-т коронавирусийн халдвар бүртгэгдээд байна. Ерөнхийлөгч Трамп үндэсний хэмжээний онц байдал зарлаж хөл хорио тогтоолоо. Мөн мужууд нь өөрсдийн онцлогт тохирсон шийдвэрүүдийг гаргаж эхэлжээ. Нью Йорк хотын хувьд сургууль, цэцэрлэгийн үйл ажиллагааг бүрэн зогсоолоо. Ингэснээр 1.1 сая хүүхэд гэртээ байх нөхцөл байдал үүссэн байна. Мөн эмнэлгийн эрсдэлийг бууруулах зорилгоор нэн яаралтай биш, төлөвлөгөөт мэс заслуудыг цуцлахаар төлөвлөжээ. Холбооны улсын хэмжээнд түр дагах заавар зөвлөмжийг гаргасан байна. 50-аас дээш хүнтэй хурал цуглаан хийхийг хориглож, зайлшгүй шаардлагатай бол онлайнаар харьцахыг санууллаа. Хүний тоо бага хурал цуглаан хийх бол гарын ариун цэврийг сайтар сахиж, 1 метрээс илүү зайтай байхыг зөвлөмжид тусгасан байна. 

БНСУ-Д КОРОНАВИРУСИЙН УЛМААС 75 ИРГЭН НАС БАРААД БАЙНА 

БНСУ-ын Халдварт өвчин судлалын төв сүүлийн 24 цагийн мэдээллийг өглөө. Шөнийн 00 цагийн байдлаар шинэ тохиолдол 74-өөр нэмэгдэж халдвартай иргэний тоо 8236-д хүрсэн байна. Шинээр 

- Сөүл 6

- Бусан 1

- Дэгү 35

- Сэжөн 1

- Кёнги 7 тохиолдол бүртгэгджээ.

Өнөөдрийн байдлаар 274 мянган иргэнийгшинжилгээнд хамруулснаас 251 мянган иргэний хариу сөрөг гарсан байна. Нийт 1137 иргэн бүрэн эдгэрч эмнэлгээс гарсан бол 75 хүн нас барлаа. Харин 7  мянга хүнийг тусгаарлаад байна. 

БНХАУ-Д 67,863 ХҮН БҮРЭН ЭДГЭРЧ ЭМНЭЛГЭЭС ГАРЛАА

Хятадын 31 мужид коронавирусын халдвар бүртгэгдсэн. Сүүлийн 24 цагт халдвартай хүний тоо 30-аар нэмэгдэж 81,078 болсон байна. Биеийн байдал хүнд  3,032 хүн байгаа бол 3,218 хүн нас баржээ. Харин 67,863 хүн бүрэн эдгэрч эмнэлгээс гарчээ. Бүгд Найрамдах Хятад Ард Улсын Хонконгт 149, Макао 11, Тайвань 59 гээд нийт 219 тохиолд бүртгэгджээ. Хятадад зөөвөрлөгдсөн 123 тохиолдол байгаа юм. Шинэ төрлийн коронавирусийн халдвар дэлхийн 150 улсад бүртгэгдсэн. Үүнд Узбекистанд зөөвөрлөгдөн нэг тохиолдол бүртгэгдсэн бол Төв Африкийн Бүгд найрамдах улс, Сейшиллийн арлууд, Эквадорын Гвиней, Бүгд Найрамдах Конго,  Руанда, Анитгуа ба Барбуда, Мавритан, Вазиландад бүртгэгдээ.

ДЭМБ ӨВЧНӨӨС ХАМГААЛЖ БУЙ МОНГОЛЫН ТУРШЛАГЫГ ДЭЛХИЙД ТАНИЛЦУУЛЛАА 

 Коронавирус өвчний голомт Бүгд Найрамдах Х ятад Ард Улсад бий. Хил залгаа гэдэг утгаараа өндөр эрсдэлтэй орны тоонд Монгол багтаж байсан юм. Харин өнөөдрийн байдлаар нэг ч иргэн энэ өвчин хүрээгүй. Бүртгэгдсэн нэг тохиолдол нь Франц улсын иргэнд зөөвөрлөгдөн ирсэн байгааг олон улсад мэдээлж байна. Монголын засгийн газрын авч хэрэгжүүлж буй шат дараалсан арга хэмжээ, урьдчилан сэргийлсэн байдал нь цаг үеэ олсон, оновчтой байсныг онцолжээ. Мөн иргэд нь заавар зөвлөмж, зөвлөгөөг сайтар дагаж, нийтээрээ өвчнөөс урьдчилан сэргийлж чадсан гэдгийг дамжуулсан байна. Монгол улс өвчний сэжигтэй тохиолдол бүртгэгдмэгц  хөл хорио тогтоох, сэжигтэй иргэнтэй уулзсан хүмүүсийг яаралтай олж илрүүлэх гээд өвчний тархалтаас сайтар урьдчилан сэргийлж байгааг онцолсон байна. Цаашид ч энэ арга хэмжээгээ үргэлжлүүлэн авахыг сануулжээ. Харин Европ болон бусад улс оронд Монголын арга хэмжээ туршлага болох ёстойг сануулжээ.