“ДРАГОН” ТӨВИЙГ ХОТЫН ЗАХ РУУ НҮҮЛГЭВЭЛ СХД-ИЙН АВТО ЗАМЫН ТҮГЖРЭЛ БУУРНА

Сонгинохайрхан дүүргийн 29-р хороонд баруун аймгууд руу зорчих авто тээврийн төв буудал буюу Драгон төв бий. Энд өдөрт 10-12 мянган хүн үйлчлүүлж, олон мянган автомашин нэг дор цугладаг байна. Үүнээс үүдэн орчны бохирдол их хэмжээгээр үүсч, автозамын түгжрэл, архидалт, элдэв гэмт хэрэг гарах болжээ. Гэтэл энэ төвийг тойрсон орон сууцанд 4 мянга орчим иргэн амьдардаг. Тэдний аюулгүй байдал ч хөндөгдөх болсон байна. Тийм учраас Драгон төвийг шинэ авто худалдааны төв рүү нүүлгэхээр төлөвлөжээ.

СХД-ийн 29 хорооны нутаг дэвсгэр  байрлах Драгон төвийг нүүлгэхийг шаардаж байна. Учир нь Драгон авто терминал байгуулагдсан цагаасаа эхлэн эндхийн оршин суугчдын эрүүл, аюулгүй орчинд амьдрах хуулиар олгогдсон эрх зөрчигдөж эхэлжээ.Мөн гэмт хэргийн гаралт ч огцом нэмэгдсэн байна.  Өдөртөө Драгон орчмоор 5-6 мянган автомашин, 10-12 мянган иргэн эргэлдэж авто замын түгжрэлийг үүсгэж иргэдийг багагүй бухимдуулж байна.

“ДРАГОН” ТӨВИЙГ “ШИНЭ АВТО ХУДЛДААНЫ ТӨВ” РҮҮ НҮҮЛГЭХ АЖЛЫГ ЭРЧИМЖҮҮЛЭХИЙГ ШААРДАЖ БАЙНА

Драгон төвийг Шинэ авто худалдааны төв рүү нүүлгэх сураг нэг хэсэг сонсогдсон ч мэдээлэл сүүлдээ нам жим болсон тухай иргэдийн төлөөлөл хэлж байна. Тиймээс бид энэ төвийг хотын зах руу нүүлгэх асуудал дээр дүүргийн удирдлага, хууль тогтоох дээд байгууллагад иргэдийг төлөөлөл болон сууж байгаа Их хурлын гишүүдээс саналыг сонслоо.

Драгон төвийг тойрсон орон сууцны иргэд, энд үйл ажиллагаа явуулж байгаа газрууд ямар ч эрүүл ахуйн шаардлага хангахгүй байгаа тухай тус дүүргийн мэргэжлийн хяналтын байгууллагаас хэлж байна. Олон мянган иргэд үйлчлүүлдэг энэ газарт 00 хүрэлцээ муу, ариун цэврийн шаардлага хангадаггүй. Тиймээс зарим иргэд орон сууцны хонгил, байрны ойр орчимд бие засчихдаг гээд олон асуудал байна.

Уг нь хотын зах руу Шинэ авто худалдааны төв рүү Драгон төвийг нүүлгэчихвэл Геологийн төв лаборатори орчмын замын хөдөлгөөний ачаалал ч буурна. Мөн эрүүл аюулгүй орчинд амьдрах эрх нь зөрчигдөөд байгаа орон сууцны оршин суугчдын асуудал ч цэгцрэх юм. Тиймээс Драгон төвийг “Шинэ авто худлдааны төв” рүү нүүлгэх ажлыг эрчимжүүлэхийг шаардаж байна.