АРХАНГАЙ АЙМГИЙН ЗАРИМ СУМДАД ӨВС ТЭЖЭЭЛ ШААРДЛАГАТАЙ БОЛЖЭЭ

Хөвсгөл, Завхан аймгуудад хаваржилт хүндэрч зудын байдалд шилжээд байна. Цасны зузаан 50-70 см хүрч мал бэлчих боломжгүй болжээ. Малчдын байдал хэцүүдэж байгаа тул онцгой комиссын зөвшөөрөлтэйгээр Хүнс, хөдөө аж ахуй, хөнгөн үйлдвэрийн дэд сайдаар ахлуулсан баг хаваржилт хүндэрсэн аймгуудад ажиллалаа. Архангай аймгийн Өлзийт, Хашаат, Өгийнуур зэрэг сумдад өвч тэжээлийн нөөц дуусч, малын хорогдол ч нэмэгдэх болсон байна.  

Улсын онцгой комиссоос олгосон тусгай зөвшөөрлийн дагуу Архангай аймгийн зарим сумдад ажиллахад Архангай аймгийн Өлзийт, Хашаат, Өгийнуур зэрэг сумдад хаваржилт хүндэрч, малын хорогдол багагүй болсон байна. Тухайлбал, Хашаат сумын хувьд туурайн зудтай байгааг мэдэгдлээ. Хашаат сум 372 гаруй мянган толгой мал тоолуулсан байна. Он гарсаар орсон хэд хэдэн удаагийн их хэмжээний цаснаас үүдэж өл алдах явдал байгааг хэлж байлаа. Харин Өгийннуур сумын хувьд мөн л 324 гаруй мянган мал тоолуулсан байна. Мал хээл хаях, өл алдах зэргээр хорогдож байгааг сумын удирдлагууд онцолж байлаа. 

Сумын удирдлагуудын хувьд нөхцөл байдал хүндэрсэн ч зэргэлдээх орон нутгаас өвс тэжээл татах зэргээр ажиллаж байгаа гэлээ. Архангай аймгийн хувьд улсдаа малын тоо толгойгоор тэргүүлдэг аймгийн нэг юм. Өнгөрсөн онд зургаан сая толгой мал тоолуулсан байна. Хаваржилт хүндэрвэл малын тоо толгойд, малчин иргэдийн амьжиргаад сөргөөр нөлөөлөх нөхцөл байдал үүсэхэд хүрнэ гэдгийг албаныхан анхааруулж байна.

Тус аймгийн хувьд зүүн зургаа, баруун талын таван сумдад 30см хэмжээтэй цас орсноос нөхцөл байдал хүндэрчээ. Орон нутгийн аюулгүйн фондоос шаардлагатай хөрөнгийг зарцуулж дууссан байна. Мал турж эцэх, хээл хаях зэрэг асуудал гарч байгааг орон нутгийн удирдлагууд учирлаж байна. Тус аймагт тулгамдаад байгаа асуудалд салбар яамнаас дэмжлэг үзүүлэх асуудал ч яригдлаа.

Энэ жилийн хувьд 1.9 сая толгой төл авахаар төлөвлөж байгаа ч төлийн хорогдол багагүй байгааг онцоллоо. Мөн Өгийнуур суманд галзуу өвчин гарсан, бог малд дотрын хордлого гарч байгаа учраас эм бэлдмэл, вакцин шаардлагатайг хэлж байна. Засгийн газраас Архангай аймагт 150 тонн өвс үнэгүй, 125 тонн тэжээл 50 хувийн хөнгөлөлттэй олгсон, мөн 50 сая төгрөгийн дэмжлэг үзүүлжээ.