"Нийслэлийн харьяа байгууллагууд бүх албан бичгээ өнөөдрөөс цахимаар хүлээж авах боломжтой боллоо"

COVID-19 халдвараас урьдчилан сэргийлэх ажлын хүрээнд бүх цаасан бичиг баримтыг цахимаар хүлээн авах болсон талаар нийслэлийн Мэдээлэл технологийн газраас өнөөдөр мэдээлэл хийлээ.

Нийслэлийн Инноваци технологийн асуудал хариуцсан төслийн удирдагч М.Халиунбат “Монгол Улсын иргэд одоогоор төрийн 400 гаруй үйлчилгээг авдгаас 300 гаруй үйлчилгээг нийслэл иргэддээ үзүүлж байна.

Өнөөдрөөс эхлэн аж ахуйн нэгжүүд нийслэл рүү албан бичгүүдээ 100 хувь цахимаар илгээх боломжтой боллоо. Үүнтэй холбоотойгоор маш их бичиг баримт нааш, цааш илгээдэг нь архивын газруудад ачаалал бий болгодог. Зарим нь үрэгдэх ч эрсдэлтэй. 

Мөн хоорондоо биеэр бичиг баримт дамжуулах нь СOVID-19 халдвар дэлхий улс орнуудад тархаад буй энэ үед халдвар дамжуулах эрсдэл бий учраас яаралтай нийслэлийн албан хэрэг хөтлөлтөд цахим системийг ашиглахаар болж байна.

Түүнчлэн бид 2020 онд Монгол Улсын хэмжээний архивын бичиг баримтын 30 хувийг цахимжуулах зорилт тавин ажиллаж байна” гэв.

Нийслэлийн мэдээллийн технологийн газрын дарга О.Чинзориг “Нийслэлийн 1,100 гаруй байгууллага 2016 оноос эхлэн дотоод албан бичиг хөтлөлтөө цахимжуулж эхэлсэн. Энэ хугацаанд бид хоорондоо 800 мянга гаруй бичгийг цахимаар солилцсон байна.

Албан бичгээ цахимаар солилцоход хугацаа болон зардал хэмнэх давуу тал бий болж байна. Учир нь нэг албан бичгийг хүргэхэд ойролцоогоор 1-2 хоног шаарддаг бөгөөд зардал нь 1,000-1,500 төгрөг гардаг.

Энэхүү цахимжилт хэрэгжсэнээр нийслэлийн албан бичиг хүргэлтийг 40-60 хувь бууруулсан гэж бид үзэж байна" гэлээ.

"Смарт оффис” системийг ашиглахын тулд аж ахуйн нэгжүүд Тоон гарын үсгийн Гэрчилгээ олгогч байгууллагаас тоон гарын үсгийн гэрчилгээ авсан байх шаардлагатай бөгөөд https://smartoffice.mn эсвэл нийслэлийн http://ulaanbaatar.mn/ цахим хуудас руу хандаж “Албан бичиг” цэсийг сонгон бүртгүүлснээр хандах эрхтэй болно гэдгийг “Newsonic” компанийн захирал Д.Анхбаяр онцолж хэлсэн юм.

Мөн тэрбээр "Ингэхдээ аж ахуйн нэгжүүд үндсэн албан бичгээ тоон гарын үсгээрээ заавал давхар баталгаажуулж илгээнэ. Түүнээс гадна энэ системд холбогдсон байгууллагууд хоорондоо албан бичиг, мэдээллээ солилцох боломжтой болж байна.

Албан бичиг солилцоход анхаарахад зүйл нь:

• Аж ахуйн нэгжүүд зөвхөн тоон гарын үсгийн гэрчилгээ олгогч “МонПасс СА”, TRIDUM гэсэн хоёр байгууллагын гарын үсгийг ашиглана,
• Түүнээс гадна нэг аж ахуйн нэгж нэг л гарын үсэг эзэмших эрхтэй,
• Систем давжуулахдаа зөвхөн PDF өргөтгөлтэй файл дамжуулна,
• Систем дамжуулж буй файлдаа зөвхөн нэг удаа тоон гарын үсэг зурсан байна,
• Мөн зар сурталчилгаа явуулахыг хатуу хориглоно" гэсэн юм.

"Хэрвээ тухайн илгээсэн баримтын эх хувь зайлшгүй шаардлагатай гэж үзсэн тохиолдолд хоёр тал ярилцаж хоорондоо биеэр солилцох учир эх хувийг хадгалах нь зөв" гэх мэдээллийг Нийслэлийн архивын газрын мэдээллийн технологийн хэлтсийн дарга Х.Төмөрбаатар өглөө.