Ө.Энхтүвшин: Италиас ирье гэж байгаа 300 орчим иргэн байна

Улсын онцгой комиссоос гаргасан шийдвэрийн талаар мэдээлэл хийж байна. 

Шадар сайд Ө.Энхтүвшин "

УОК-ын 13 дахь удаагийн хуралдаанаар бүх шатны боловсролын байгууллагын үйл ажиллагааг сунгах эсэх тухай хэлэлцэн шийдвэр гаргалаа. 

Байдал улам амаргүй болж байна. Хэдийгээр БНХАУ хяналтдаа авч байгаа гэсэн боловч АНУ болон Европын улсуудын байдал улам хүндэрч байна" гэлээ. 

Салбарын сайд нар УОК-ын шийдвэрийг танилцуулсны дараа сэтгүүлчдийн асуултад хариуллаа. 

-Хугацаа сунгахаар эдийн засагтай холбоотой арга хэмжээ авагдах уу?

-Эдийн засаг, төсөв санхүүтэй холбоотой хүндрэл гарна. Түүнийг яаж даван туулах вэ гэдэг дээр илүү сайн ярилцах шаардлага гарна. Засгийн газрын хуралдаанаар 4-5 удаа энэ талаар ярилцсан. Тодорхой хэмжээний тохиролцоонд хүрээд ажил хэрэг болоод явж байгаа. 

Засгийн газар хэзээ хуралдах нь тодорхойгүй байна. 

-Итали улсад байгаа иргэдтэйгээ холбогдсон болов уу?

-Итали улсад амьдарч байгаа иргэдээс ирүүлсэн саналыг бид мэдэж байгаа. Яаралтай ирье гэж байгаа 300 орчим иргэн байгаа. 

Зөвхөн Итали бус Европын бусад орон, Австрали, Энэтхэг, АНУ-д байгаа иргэд дараагийн чартер нислэг хэзээ хийгдэх вэ гэдэг асуудлыг тавьж байгаа. 

Европын орнуудад гадныхан битгий хэл өөрсдийнх нь иргэдэд нөхцөл байдал хүнд байгаа. Бид дараагийн нислэгээ 14 хоногийн дараагаас хийхээр төлөвлөж, бэлтгэл хангаж байгаа. Чухам хаашаа хийх вэ гэдгийг ЗТХЯ-нд судалж байна. 

Монгол иргэд байгаа газар болгон руу онгоц нисгээд иргэдээ авчрах боломжгүй. 
Бид агаарын харилцааны гэрээтэй орнуудтай л харилцана. Тийм хэлэлцээр байхгүй орнууд руу МИАТ-ын онгоц нисгэнэ гэвэл худлаа. 

14 хоногийн хугацаанд сая явуулсан орнууд руугаа ахиад нислэг явуулна гэвэл худлаа. Яагаад гэвэл сая ниссэн багууд бүгд тусгаарлалтад орсон. Энэ хооронд сая авчирсан иргэдийнхээ эрүүл мэндийн байдлыг тодорхой болгох шаардлагатай байна. 

-Илэрсэн байгаа зургаан хүнийг хаана, хэнтэй уулзсан гэдэг маршрутыг гаргахгүй бол тухайн оронд хамт байсан хүмүүс нь айдастай байгаа байх. 
Хоёрдугаарт төлбөртэй сургуулийн төлбөрийг хэрхэн шийдэх вэ?

Ё.Баатарбилэг: -Засгийн газраас төсвийн ерөнхийлөн захирагч нарт төсвийнхөө боломжтой хэсэгт өөрчлөлт оруулах чиглэл өгсөн. 

Төрийн болон хувийн өмчийн сургалтын байгууллагад хүндрэл гарч байна. Хувийн цэцэрлэгүүд хүүхэд явахгүй байгаа учраас багш нарынхаа цалинг өгч чадахгүй, төлбөртэй ЕБС-иудад хүүхэд төлбөрөө төлөөгүй учраас ажилчдынхаа цалинг тавьж чадахгүй нөхцөл үүсээд байна. 

Оюутнууд хичээлийн жилийн хоёрдугаар хагаст хичээллэсэнгүй. Тиймээс энэ хугацааны төлбөрийг сургуулиуд хуримтлуулаагүй юм байна. Их, дээд сургуулиуд багш нараа онлайнаар хичээлээ заа гээд байдаг. Гэтэл төлбөрөө аваагүй учраас цалин тавих боломжгүй болсон. Төрийн өмчийн, хувийн хэвшлийн их, дээд сургуулиудын данс улайж байна. 

Энэ болгоныг цогцоор нь харсан шийдвэрийг гаргахаар тооцоо судалгаа хийж байна. Удахгүй Засгийн газрын хуралдаанд тодорхой асуудал оруулна. 

Б.Энх-Амгалан: -Эдийн засгийн тухайд төмрийн хүдэр, нүүрс, жонш, зэсийн баяжмалаа гаргаж байгаа. Дараагийн долоо хоногоос Гашуун сухайтын тээвэр эхэлнэ. 

Гэхдээ зөвхөн чингэлэгийн тээврээр 70-100 орчим тээврийн хэрэгслээр хийхээр төлөвлөж байна.  

Ө.Энхтүвшин: -Халдвар авсан хүмүүсийн тухайд тухайн оршин сууж байсан орондоо ямар маршрутаар явж байсан талаар асууж байх шиг байна. Бид тухайн улсуудын Элчин с айдын яам, консулын газруудтай байнга харилцаж байгаа. 

Халдвар авсан хүмүүстэй ойр байсан хүмүүст сэрэмжлүүлэх, шинжлүүлэх зөвлөгөө өгч ажиллаж байгаа. 

-Цахим хичээлийн энэ хэвээр нь үргэлжлүүлэх үү. Элсэлтийн ерөнхий шалгалтад бэлдэх апп гаргана гэсэн. Энэ талаар тодруулахгүй юу. 

Ё.Баатарбилэг: -Теле хичээлтэй холбоотой саналууд нэлээд ирж байгаа. Тэргүүлэх мэргэжлийн багш нар зааж байгаа учраас сайн зааж байна гэж байгаа. 

Харин одоо эцэг, эхчүүд хүүхдийнхээ хичээл хийж байгаа явцад анхаарахыг уриалж байна. Төр засгаас хийх ёстойгоо хийж байна. Эцэг, эхчүүд хүүхдийнхээ төлөө боловсрол, эрүүл мэндэд нь анхаараарай гэдгийг хэлмээр байна. 

Хоёрдугаарт, 12 дугаар ангийн 28 мянган хүүхэд төгсөнө. Дийлэнх нь орон нутагт байна. Энэ хүүхдүүдэд шалгалтад бэлдэх материалыг нь хурдан хугацаанд, оновчтой хэлбэрээр тараах хувилбар яригдаж байгаа. Боловсролын үнэлгээ төв дээр апплекэйшн бүтээх ажил хийгдэж байгаа. Хугацаа маш их орж байна. Дор хаяж нэг сар шаардлагатай юм байна. Хамгийн хурдан хэлбэр нь энэ юм байна.  

Манай ЕБС-иуд 12 мянган комьпютертэй. Бүгд CD уншдаг. CD дэлхий нийтийн хандлагаас хоцрогдсон гэдэг яриа гараад байгааг ойлгохгүй байна. 

Бүх хүүхдэд хамгийн хурднаар материал тараах арга энэ байсан юм шүү. 

-УИХ-ын хаврын ээлжит чуулган хугацаандаа нээлтэй хийж чадах уу?

-Өнөөдрийн нөхцөл байдалд чуулган эхлэнэ гэж хэлж чадахгүй болчихоод байна. Нөхцөл байдал цаашид яахыг харна.