Францад өдөрт нэг удаа 1 цаг, 1 км газар агаарт гарахыг зөвшөөрнө

Парис хотод ажиллаж амьдарч байгаа Монгол Улсын иргэн - Дамдинсүрэнгийн Болд 

"Бидний амьдарч байгаа Франц орны хувьд нөхцөл байдал сайнгүй байна. Хамгийн сүүлийн мэдээгээр 25233 хүн халдвар авсан. Түүнээс 1331 хүн нас барж, одоогийн байдлаар 2929 хүн эмгэнэлт хэвтэж эмчлүүлж байна. Франц орны хувьд нөхцөл байдал сайнгүй байна.

Үүнтэй холбогдуулан хөл хорио тогтоосон бөгөөд түүнийг дагаж мөрдөх дүрэм зааврыг улам чангатгах арга хэмжээг авч хэрэгжүүлж байна. Хүмүүс гадагш гарахдаа өөрийн биедээ бичиг баримтаас гадна тусгай зөвшөөрлийг хэвлэн авах юм уу эсвэл гараар бичин зорилго, он сар гарын үсгээ зурсан баталгаажуулах, журмыг зөрчсөн тохиолдолд анх 35 еврогоор торгож байсан бол одоо 135 евро, хэрвээ 2 дахь удаагаа бол 375 евро, 3 удаа бол 3750 евро эсвэл 6 сар хорих шийтгэл оноох болсон. Түүнчлэн хүмүүсийг өдөрт 1 удаа 1 цаг хүртэл гүйх, агаар салхинд алхах зэрэг спортын үйл ажиллагааг 1 км дотор хийхийг зөвшөөрсөн нь хол хорионы журам ямар хатуу болж байгааг тов тодорхой харуулж байна.

Франц дахь Монголчуудын хувьд тодорхой өгөх мэдээлэл хомс боловч бусдын адил хөл хорионы дэглэм сахин тус тусын хотдоо гэр бүлээрээ сайн байгаа гэдэгт итгэж байна. Манай ЭСЯ -наас өдөр тус өвчний талаархи мэдээлэл сэрэмжлүүлгийг цаг тухайд нь бидэнд хүргэж байгаад баяртай байгаагаа дуулгасан байна.

Амны хаалтын хувьд Франц гэлтгүй дэлхий даяар асуудал үүсгэж байна. Эндхийн аптек ямар ч амны хаалт, ариутгах шингэн зарахгүй байгаа бөгөөд тасраад удаж байгаа сурагтай. Эндхийн үйлдвэрүүд амны хаалт тасралтгүй үйлдвэрлэж байгаа боловч тус бүтээгдэхүүнээ хамгийн эн тэргүүнд шаардлагатай эмнэлгийн байгууллагуудыг ханган нийлүүлэх болно гэж мэдэгдэж байна.

Франц орны хувьд маш олон үндэстэн эрт дээрээс хамтран холилдон амьдарч ирсэн болохоор энэ тал дээр харьцангуй тайван улс гэж боддог. Азиудын хувьд одоогоор ямар нэг сонин хэвлэлд гарсан зүйлгүй болохоор амар тайван байгаа гэж үзэж болно.

Эмнэлэг эмчилгээний хувьд үнэхээр ярих юм байхгүй. Та хэрвээ ном дүрмийн дагуу бичиг баримт, эрүүл мэндийн даатгалтай бол бусад хүмүүсийн адил эмнэлгийн үйлчилгээ авах эрх нь таны өмнө нээлттэй байна. Харин одоогийн нөхцөл байдлаас болж тухайн орон нутгаас хамааран үйлчилгээний журамд өөрчлөлт орсон байж болох нь тодорхой. Жишээ нь, Миний бие хөл хорио тогтоохоос өмнө урьд өгсөн хуваарын дагуу эрүүл мэндийн шалтгаанаар мэс хагалбарт орсон бөгөөд удалгүй цар тахлын улмаас ихэнх мэс засал хийх хуваариудыг тодорхойгүй хугацаагаар хүчингүй болгон хойшлуулсан. Франц орон болон эмнэлгийнхээ сайхан сэтгэлт эмч сувилагч нарт насаараа баярлаж явах хүмүүсийн нэгэн би билээ. Их баярлалаа. Энэ ялдамд Монголынхоо ард түмэнд хүчтэй, эвтэй, тэвчээртэй байхыг хүсэн ерөөе.  Парис хот. 26.03.2020"