Цахим санал асуулга дуусахад тав хоног үлдлээ

Улаанбаатар хотын 9 дүүргийн нийт 173 хорооны 18-аас дээш насны бүх иргэд SmartUB аппликэйшнээр саналаа өгсөнөөр Орон нутгийн хөгжлийн сангийн хөрөнгөөр 2021 онд ямар ажил хийхийг шийднэ. Санал асуулга 3-р сарын 1-нд эхлэсэн бөгөөд одоо дуусахад 5 хоног үлдээд байна. Бид Чингэлтэй дүүрэгт санал асуулгын ажил ямар явцтай явагдаж байгаа талаар Чингэлтэй дүүргийн ЗДТГ-ын Орон нутгийн хөгжил, хөрөнгө оруулалтын хэрэгжилт хариуцсан мэргэжилтэн Ц.Баатарцэндээс тодрууллаа.

- Орон нутгийн хөгжлийн сан гэж чухам ямар зорилготой сан вэ? Уг сангийн эх үүсвэр хэрхэн бүрддэг вэ?

- Орон нутгийн хөгжлийн сан нь Засгийн газраас орон нутгийг хөгжүүлэх зорилгоор өгч буй шилжүүлэг бөгөөд зарцуулалт нь иргэдийн оролцоонд тулгуурлан, амьдарч буй орчинд нь тулгамдаж буй асуудлыг шийдвэрлэх зорилготой сан юм.

Төсвийн тухай хуулийн дагуу Монгол Улсад 2013 онд анх удаа Орон нутгийн хөгжлийн нэгдсэн санг бий болгож уг сангаас хуульд заасан дөрвөн итгэлцүүрт үндэслэн аймаг, нийслэлд орлогын шилжүүлэг олгох, аймаг, нийслэл нь мөн аргачлалын дагуу, харьяалагдах сум, дүүргийн Орон нутгийн хөгжлийн санд хөрөнгө хуваарилдаг. ОНХНС-д 2013-2020 оны байдлаар нийт 1 их наяд 137 тэрбум төгрөгийн хөрөнгө хуваарилсан. Тус сангийн эх үүсвэр нь дотоодын нэмэгдсэн өртөгийн албан татвар, газрын тосны нөөц ашигласны төлбөрийн орлого, ашигт малтмалын нөөц ашигласны төлбөр, ашигт малтмалын хайгуулын тусгай зөвшөөрөл, ашигт малтмалын ашиглалтын тусгай зөвшөөрөл зэрэг төсвийн орлогын тодорхой хувиар тооцож бүрдүүлдэг.

- Одоо явагдаж байгаа 2020 оны цахим санал асуулга бол 2021 онд хийгдэх ажлыг тодорхой болгох шүү дээ. Санал асуулгын явц хэр байна вэ? 

- Чингэлтэй дүүргийн хувьд 19 хороо 196 хэсэгтэй. Бид хороодын зохион байгуулагчид болон 196 хэсгийн ахлагч нарт Азийн сан болон Нийслэлийн Засаг даргын Тамгын газартай хамтран сургалт зохион байгуулж хамруулсан. Туршилтын санал асуулгыг дүүрэг дээрээ зохион байгуулж, санал асуулгын асуулт боловсруулахад тухайн хорооноос санал авах гэх мэт ажлуудыг зохион байгуулж дүүргийн зүгээс бэлтгэл ажлыг маш сайн хангасан. Цахим санал асуулга дуусахад 5 хоног үлдээд байна. Тиймээс санал асуулгын ажлаа улам эрчимтэй явуулж, орон нутгийн хөгжлийн сангийн цахим санал асуулгад Чингэлтэй дүүргийн иргэн бүрийн саналыг тусгахаар ажиллаж байна.

-Санал асуулга авч байгаа SmartUB аппликэйшн бүрэн ажиллагаатай байгаа юу? Ямар ч төрлийн гар утсанд ашиглах боломжтой юу?

- SmartUB аппликэйшн нь Андройд болон IOS үйлдлийн системтэй бүх төрлийн ухаалаг утсанд зориулан хийгдсэн болохоор ямарч утсанд татан суулгаж ашиглах боломжтой. Одоогоор SmartUB аппликэйшны талаар ямар нэгэн санал гомдол ирээгүй бөгөөд  аппликэйшн хэвийн ажиллаж байна.

- Нэг хүн хэдэн удаа санал өгөх боломжтой вэ?

- Орон нутгийн хөгжлийн сангийн цахим санал асуулгад нийслэлийн 9 дүүргийн 173 хорооны 18-аас дээш насны иргэн бүр оролцох боломжтой бөгөөд нэг хүн нэг л удаа саналаа өгнө. Тухайн хүний ашиглаж буй үүрэн телефоны дугаараараа саналаа баталгаажуулах код авч байгаа. Нэгэнт санал нь амжилттай илгээгдэж, батлагдсан тохиолдолд ахин тэр дугаараар санал өгөх боломжгүй юм. 

- Санал асуулгад оролцогчдын идэвх ямар байна вэ? Өнөөдрийн байдлаар Нийслэл болон Чингэлтэй дүүргийн хэмжээнд цахим санал асуулга хэдэн хувьтай явагдаж байна вэ?

- Өнөөдрийн байдлаар нийслэлийн хэмжээнд цахим санал асуулгын хувь ирц 30 орчим хувьтай явагдаж байна. Харин манай дүүргийн хувьд өмнөх жил буюу 2020 онд Орон нутгийн хөгжлийн сангийн хөрөнгөөр хийгдэх төсөл, арга хэмжээний саналыг SmartUB аппликэйшнээр 19 хороо, 196 хэсэгт цахимаар авсан нь давуу талтай байна. Иргэд өмнөх жил цахимаар саналаа өгсөн болохоор туршлагатай, идэвхтэй оролцож байгаа. Өнөөдөр буюу 2020.03.27-ны байдлаар Чингэлтэй дүүргийн 19 хорооны 68,672 иргэн санал өгөхөөс 80 хувь буюу 55,000 орчим иргэд саналаа өгөөд байна. 

- Танай дүүрэгт энэ жил Орон нутгийн хөгжлийн нэгдсэн сангаас ямар хэмжээний төсөв хуваарилагдсан бэ?

- 2020 онд Орон нутгийн хөгжлийн сангаар хийгдэх 23 төсөл, арга хэмжээний 841.2 сая төгрөгийн хөрөнгө батлагдсан. Энэ хөрөнгөөр орон нутгийн хөгжлийн сангийн цахим санал асуулгаар иргэдээс хамгийн их санал авсан ажлыг эрэмбэлэн хийж гүйцэтгэдэг учир иргэн бүрийг SmartUB аппликэйшнг ашиглан цахим санал асуулгадаа идэвхтэй оролцож, дүүрэг, хорооныхоо бүтээн байгуулалт, зөв төлөвлөлтөд заавал саналаа өгөөрэй гэж уриалж байна. 

Эх сурвалж: Цэгц медиа групп