Испани улсад нэг өдрийн дотор хамгийн олон хүн Covid-19 өвчнөөр нас барлаа

Сүүлийн 24 цагийн хугацаанд 838 өвчтөн нас барж, тахал эхэлснээс хойш нэг өдрийн дотор хамгийн олон хүнээ алдсан тухай Испанийн эрх баригчид Ням гарагт мэдээлжээ.

Тус улсын эндэгдлийн нийт тоо 6,528 хүрсэн бол халдварын тохиолдлын тоо 78,797 хүрсэн байна. Испани улс эндэгдлийн тоогоороо дэлхийд зөвхөн Италийн дараа бичигдэж, бүртгэгдсэн халдварын тоогоор АНУ, Итали, Хятадын дараа орох муу үзүүлэлттэй байгаа юм.

Халдварын бүртгэгдсэн тоогоор Хятад улсыг (81,470) гүйцэх нь цаг хугацааны асуудал болоод байна.

Covid-19 өвчнөөр нас барагсдын шарилыг тээвэрлэхэд тус улсын зэвсэгт хүчнийг дайчлах болсноо Испанийн эрүүл мэндийн яам өчигдөр мэдэгджээ.

Испани улсад хэрэгжиж байгаа хөл хорионы дэглэмийг хоёр долоо хоногоор буюу дөрөвдүгээр сарын 11 хүртэл сунгах шийдвэрийг парламент нь өчигдөр гаргасан байна. 

Нийслэл Мадрид хотод нийт эндэгдлийн тал орчим хувь нь бүртгэгдэж, шинэ коронавирусийн тахалд хамгийн хүнд нэрвэгдсэн бүс болоод байна.

Тус хотод шарил хадгалах газрын багтаамж хүрэлцэхгүй байгаагаас мөсөн гулгуурын талбайг ашиглаж эхлээд байгаа юм.

Эх сурвалж: Reuters