"Итали улс бүх хязгаарлалтын арга хэмжээг зургаадугаар сар хүрч байж цуцална гэж Ерөнхий сайд нь мэдэгдсэн"

"Дэлхий дээр нийт 713,021 хүн COVID-19 халдвараар өвчилж, 33,557 хүн амь насаа алдсан бол 146,629 хүн эдгэрч, эмнэлгээс гарсан" гэж 

ЭМЯ-ны Гадаад харилцаа, хамтын ажиллагааны хэлтсийн дарга Б.Янжмаа өнөөдөр хийсэн мэдээллийн үеэр хэллээ.

Үргэлжлүүлэн тэрбээр "АНУ-д халдварын тохиолдол 140 мянга гаруйд хүрч, нийт 2,400 орчим хүн нас баржээ. Тус улсын Харшил, халдварт өвчний хүрээлэнгийн захирал ард иргэддээ хандаж “АНУ-д халдварын оргил үе хараахан болоогүй. Ирэх 7 хоногт халдварын тоо болон нас баралтын тоо оргилдоо хүрэх магадлалтай байна. 

Мөн математик тооцооллын дагуу тус улсад хэдэн сая хүн халдвар авч, нас баралт 100 мянгад хүрэх тооцоолол байгаа” гэж мэдэгджээ.

Үүнтэй холбоотойгоор АНУ-ын холбооны Засгийн газраас гуравдугаар сарын 31-нийг хүртэл тогтоосон хязгаарлалтын арга хэмжээнүүдээ дөрөвдүгээр сарын 30-ныг хүртэл сунгаж мөрдүүлэхээр шийдвэрлэсэн байна.

Европ тивд халдвар голомтлон тархаж байгаа улс орнуудын хувьд, Итали улсад Ням гарагт 756 нас баралт бүртгэгдсэн байна. Баасан гарагт тус улсад 919 нас баралт бүртгэгдсэнээс хойш Бямба, Ням гарагт нас баралтын тоо дараалан ялимгүй буурсан үзүүлэлт харагдаж байгаа.

Мөн дөрөвдүгээр сарын 3-нд дуусах байсан хөл хориог цааш үргэлжлүүлнэ гэж Ерөнхий сайд нь мэдэгдсэн бөгөөд бүх хязгаарлалтын арга хэмжээг энэ оны зургаадугаар сар хүрч байж цуцлах талаар нэмж хэлжээ.

Испани улсад өнгөрсөн 24 цагийн хугацаанд 838 нас баралт бүртгэгдсэн нь халдвар анх гарснаас хойших хамгийн өндөр үзүүлэлт юм.

Франц улсад халдварын шинэ тохиолдол 2,600 орчим бүртгэгдэж, 292 хүн халдварын улмаас нас барсан. Одоогийн байдлаар 19,000 орчим өвчтөн эмнэлэгт хэвтэн эмчлүүлж байгаагаас 4,600 нь эрчимт эмчилгээ хийлгэж буй аж.

ХБНГУ-д халдвар авсан хүний тоо ганцхан хоногийн дотор 4,000 гаруйгаар нэмэгдсэн байна. Мөн тус улс Франц улсад эрчимт эмчилгээ шаардлагатай 50 орчим өвчтөнийг хүлээн авч, эмнэлгийн тусламж үзүүлэхээр болжээ.

Япон улсад 48,000 гаруй лабораторийн шинжилгээ хийж, нийт 1,700 гаруй халдварын тохиолдлыг илрүүлжээ. Сүүлийн өдрүүдэд Токио хотод эх уурхай нь тодорхойгүй өвчлөл гарч, халдварын тохиолдол нэмэгдэж байгаа талаар эх сурвалжууд мэдээлж байна.

БНСУ-д COVID-19 халдварыг илрүүлэх шинжилгээг маш эрчимтэй хийж буй. Тус улсын Өвчний хяналт, сэргийлэлтийн төвийн мэдээлснээр нийт 394,000 гаруй хүнд шинжилгээ хийж, 9,600 гаруй халдварын тохиолдлыг илрүүлжээ.

Өнгөрсөн хоногт БНСУ-д шинээр 78 тохиолдол илрүүлснээс 13 нь гаднаас зөөвөрлөгдсөн, 31 нь Сөүл хот орчмын бүсээс, 14 нь Дэгү хотод бүртгэгджээ.

Түүнчлэн тус улс Лхагва гарагаас гаднаас ирэх бүх зорчигчийг 14 хоног заавал тусгаарлах шийдвэр гаргаад байна. Ингэхдээ тус улсын байнгын оршин суугч биш бол өөрөө зардлаа гаргаж, 14 хоног карантинд байхаар шийдвэрлэжээ" гэлээ.