Г.Сугарбат: Экспортын барааг ариутгаж, гадаад жолоочийг Монголд бага хугацаанд байлгах чиглэл барьж байна

Улсын онцгой комиссын Шуурхай штабаас өнөөдөр мэдээлэл хийж, цаг үеийн нөхцөл байдалд уялдуулан авч буй арга хэмжээний талаар мэдээлэл хийлээ.

Хурлын үеэр МХЕГ-ын дэд дарга Г.Сугарбат мэргэжлийн хяналтын байгууллагаас хэрэгжүүлж буй арга хэмжээг танилцуулав.

Тэрбээр "Улс орнууд цар тахлын үед хүнсний бараа бүтээгдэхүүнийг нөөцлөх, тээвэрлэхэд онцгойлон анхаардаг. Үүний адилаар манай улс гадаадаас тээвэрлэгдэн ирж буй хүнсний бараа бүтээгдэхүүнийг импортлоход онцгой анхаарч байна.

Мах, гурилын үнэ, хангамж тогтвортой байгаа. Гэхдээ эрсдэлтэй газраас ирж буй ачаа тээврийг хилээр нэвтэрч орж ирснээс эхлэн хяналт шалгалтыг тогтмол хийж байна. 

Гуравдугаар сарын 26, 27-нд Замын-Үүд, Алтанбулаг, Боршоо, Цагааннуур боомтоор 183 жолооч орж ирсний 35 нь гадаад жолооч. 171 автомашинаар 435 тонн хүнсний бараа бүтээгдэхүүн, 848 тонн хүнсний бус бараа бүтээгдэхүүн Монгол Улсын хилээр орж ирсэн. Эд бүгдэд ариутгал халдваргүйтгэл хийж байна. 

Гадаад жолоочтой тээврийн хэрэгслийг маш бага хугацаанд Монголд байлган, халдвар хамгааллын дүрмийг чанд мөрдүүлж, буцаан гаргах чиглэлийг Шуурхай штабаас барьж байгаа. Гэтэл өнгөрсөн шөнө Орхон аймагт байрлах Эрдэнэт үйлдвэрт ирсэн гадаад жолоочтой тийрийг ажлын цаг дууссан гэх шалтгаанаар ачааг хүлээн авалгүй хонуулсан" гэв. 

Түүнчлэн тэрбээр мэргэжлийн хяналтын байгууллагаас 28 вагонд хяналт хийж, 17 мянган тонн буудайнаас дээж авч, хяналт шалгалтыг үргэлжлүүлж байгаа талаар мэдээлсэн юм.

Шивээхүрэнгийн боомтод ариутгал, халдваргүйтгэлийн гурван цэгийг шинээр зохион байгуулсан

Өнөөдөр Өмнөговь аймгийн Шивээхүрэн боомтоор нүүрс тээвэрлэж эхэлсэн. Одоогоор 100 орчим тээврийн хэрэгсэл бэлэн байдлаа хангажээ. Уг боомт дээр ариутгал, халдваргүйтгэлийн гурван цэгийг шинээр зохион байгуулж, ариутгал, халдвар хамгааллын дэглэмийг сахин ажиллаж байгааг МХЕГ-ын дэд дарга Г.Сугарбат цохон тэмдэглэв.

Мөн "Нүүрс тээврийг эхлүүлсэн хилийн боомтуудад ариутгал, халдваргүйтгэлийг дээд зэргээр хийж, жолооч нарыг тусгай хамгаалалтын хувцастайгаар оруулж гарган, нарийн хяналттай ажиллаж байгаа. Өөрөөр хэлбэл, экспортын үйл ажиллагаанд эрсдэл үүсэхээс сэргийлж ажиллаж байна" гэлээ.

Түүнчлэн цаг агаар дулаарч байгаа тул иргэд бөөнөөр цуглах, хүүхдүүд олон нийтийн газраар авч явах тохиолдол гарч байгаа тул энэ мэт хэнэггүй үйлдлээ зогсоож, мэргэжлийн байгууллагын үйл ажиллагааг дэмжихийг хүслээ.