Ханой хотын томоохон эмнэлэг Вьетнам улс дахь коронавирусийн тархалтын төв болжээ

Ханой хотын томоохон эмнэлэг Вьетнам улс дахь коронавирусийн халдварын хамгийн том голомт болсон тул олон нийтээс тусгаарлах арга хэмжээ авчээ.

Халуун орны халдварт өвчнүүдийг эмчлэх зориулалттай Бах Май эмнэлэгт гарсан тархалтын улмаас 16 хүн өвчилснийг тогтоосны дараа Ням гарагийн өглөө эмнэлгийг гадаад ертөнцөөс бүрэн тусгаарлаж, хөл хорих арга хэмжээ авсан байна.

Гуравдугаар сарын 25-нд Вьетнамын албаныхан тус эмнэлгээс халдварын гурван тохиолдол илрүүлсний дараа 4,000 эмч, ажилтан, 1,000 орчим өвчтөнд Covid-19 халдварын шинжилгээ хийх шийдвэр гаргаж байв.

Тэр цагаас хойш Бах Май эмнэлгээс гаралтай халдварын тохиолдлууд огцом нэмэгджээ.

Саяхныг хүртэл Вьетнам улсад халдварын нийт 179 тохиолдол бүртгэгдэж, ганц ч өвчтөн нас бараагүй байгаа. Халдварын тохиолдлын ихэнх нь Европ болон бусад гадаад улсаас ирсэн хүмүүсээс илрээд байжээ.

Харин одоо Бах Май эмнэлэг тус улсын дотоодод тархсан хамгийн том халдварын төв болох төлөвтэй байна. Сүүлийн 10 өдрийн турш тус эмнэлэгт 14,000 орчим хүн очиж үйлчлүүлсэн гэх тоог засгийн газар гаргажээ.

Вьетнамын эрүүл мэндийн яам гуравдугаар сарын 12-ноос хойш Бах Май эмнэлэгт очсон бүх хүмүүсийг орон нутгийнхаа засаг захиргаанд мэдэгдэж, 14 хоног өөрийгөө тусгаарлах шаардлагатайг анхааруулаад байна.

Эх сурвалж: Bloomberg