Б.Янжмаа: АНУ-д N95 амны хаалтыг ариутган, дахин хэрэглэх боломжийг бүрдүүлжээ

ЭМЯ-ны Гадаад харилцаа, хамтын ажиллагааны хэлтсийн дарга Б.Янжмаа дэлхийн улс орнууд COVID-19 халдварын эсрэг ямар арга хэмжээ авч байгааг танилцуулав.

Тэрбээр "Италид өнгөрсөн нэг хоногийн хугацаанд 812 нас баралт бүртгэгдлээ. Халдварын 4,050 тохиолбол бүртгэгдсэн нь гуравдугаар сарын 12-ноос хойших хамгийн цөөн тохиолдол боллоо. 

АНУ-д нийт халдварын тоо 160,000-д хүрч, нас баралт 500 гаруй бүртгэгдсэн байна. Тус улс нэг хоногт 100,000 хүнийг шинжилгээнд хамруулах боломжтой болсноо мэдэгдсэн бөгөөд одоогоор нэг сая гаруй иргэнийг шинжилгээнд хамруулаад байна. 

Мөн хэрэглэсэн N95 амны хаалтыг ариутган, дахин хэрэглэх боломжтой технологи бүхий машиныг ашиглах зөвшөөрлийг олгожээ. Ингэснээр нэг машин өдөрт 120 мянга хүртэлх тоннын N95 амны хаалтыг ариутгах боломжтой аж.

Энэ машинаар нэг амны хаалтыг 20 удаа хэрэглэх боломжийг бүрдүүлжээ.

Түүнчлэн тус улсын автомашин үйлдвэрлэгч Ford motors компани эмнэлгийн тоног төхөөрөмж үйлдвэрлэгч компанитай хамтран амьсгалын аппарат үйлдвэрлэх болсон талаараа мэдээлэл хийжээ. Тэд гурван сар гаруйн хугацаанд нийт 50 мянга орчим амьсгалын аппарат үйлдвэрлэх хүчин чадалтай юм байна.

БНСУ-ын Сөүл хотод сүүлийн өдрүүдэд халдварын тоо нэмэгдэж байна. Сөүл хотын эргэн тойронд сүүлийн өдрүүдэд бүртгэгдсэн тохиолдлуудын дийлэнх нь гадаад улсаас зөөвөрлөгдсөн байна.

Ялангуяа эх орондоо буцаж очсон солонгос иргэдийн 70 орчим хувь нь тус хотын эргэн тойронд амьдардаг гэж тус улсын Өвчний хяналт сэргийлэлтийн төвөөс мэдэгджээ.

Халдварын голомт бүрэн устаагүй гэж үзэж байгаа учраас БНСУ хичээлийн шинэ жилийг дөрөвдүгээр сарын 9-нөөс эхлүүлж, сургалтыг цахимаар явуулах болсон байна.

ДЭМБ-ын нөхцөл байдлын тайланд дурдсанаар COVID-19 өвчлөлийн нас баралт дэлхийн хэмжээнд 4.79 хувьтай байна" гэлээ.

"COVID-19 халдвар улс орнуудын эрүүл мэндийн тогтолцоог туйлдуулж байна"

ДЭМБ-ын ажилтан О.Ариунтуяа “ДЭМБ-ын гуравдугаар сарын 30-ны мэдээллээр нийт 204 улсад COVID-19-ийн нийт 697,244 тохиолдол бүртгэгдэж, 33,257 хүн өвчний улмаас нас баржээ.

Дэлхийн улс орны 20%-д нь халдвар импортлогдон гарч байгаа бол 80 хувьд нь голомтлон тархаж байна.

Шинж тэмдэггүй тохиолдлын тоо хэд хэдэн оронд бүртгэгдсэн. COVID-19 халдвар улс орнуудын эрүүл мэндийн тогтолцоог туйлдуулж байна. Эмнэлгийн ачаалал нэмэгдэж, ачааллаа даахгүй, үйл ажиллагаагаа хэвийн явуулах нөхцөл алдагдахад хүргэж байна.

Өмнөх дэгдэлтээс харахад, эмнэлэг хэт ачаалалтай ажиллах үед ердийн эмчлэгддэг өвчний улмаас амь насаа алдах тохиолдол эрс нэмэгдэж байсан учир энэ тал дээр анхаарлаа хандуулах нь чухал болоод байгаа юм.

Хэдий бид цар тахалтай тэмцэж байгаа ч хүн амдаа нэн шаардлагатай тусламж үйлчилгээг тасалдуулахгүй байх ёстойг ДЭМБ-ын ерөнхий захирал онцолж байна.

Мөн ДЭМБ-аас сэжигтэй тохиолдол болон хавьтлуудыг эрт илрүүлэн тусгаарлахын зөвлөж буй” гэсэн мэдээлэл өглөө.