АНУ-ын засаг захиргаа 3M компанийн амны хаалтны экспортыг зогсоосон нь бусад улс орнуудыг хүнд байдалд оруулав

АНУ-ын 3M компанийн N95 амны хаалтны экспортыг зогсоох захирамж Цагаан ордноос ирсэн тухай тус компанийн төлөөлөгч Баасан гарагт мэдээлжээ.

3M компанийн бүтээгдэхүүнийг дэлхийн олон орон худалдан авч, эмнэлгийн хэрэгслийн гол нийлүүлэгчээ болгодог. Тэдгээрийн нэг Канад улсын ерөнхий сайд Цагаан ордны шийдвэрийг шүүмжилсэн мэдэгдэл гаргажээ.

Ерөнхий сайд Жастин Трюдо уг шийдвэрийг ноцтой алдаа гэж үзэж байгаагаа илэрхийлээд Канадын олон мянган сувилагч АНУ-д ажиллаж байгаа, Канадаас АНУ-д эрүүл мэндийн чухал бүтээгдэхүүнүүд нийлүүлдгийг анхааруулсан нь хариу арга хэмжээ авах боломжтойг Цагаан ордонд сануулсан хэрэг байв.

“Бид эмнэлгийн чухал хангамжаа АНУ-аас авдаг. Гэхдээ Канадаас АНУ-д өдөр бүр олон мянган анагаахын мэргэжилтэн очиж ажилладаг, эмнэлгийн бусад бараа бүтээгдэхүүн нийлүүлдгийг санах хэрэгтэй” гэж Трюдо мэдэгджээ.

N95 ангиллын амны хаалт нь коронавирусийн тахалтай тэмцэж буй эмч, сувилагч нарын чухал хамгаалах хэрэгсэл юм.

Трампын засаг захиргаа 3M компанид Канад болон Латин Америкийн зах зээлд бүтээгдэхүүн нийлүүэхээ зогсоох үүрэг өгсөн тухай тус компанийн гүйцэтгэх захирал Майк Роман мэдээлжээ.

Майк Роман гадаад экспортыг зогсоосноор АНУ-д нийлүүлэх амны хаалтны тоо хэмжээ огцом нэмэгдэхгүй болохыг Цагаан ордны албаныханд хэдэн өдөр тайлбарласан ч үр дүнд хүрээгүйг өчигдөр CNBC сувагт ярьсан байна. Тэрээр экспортын хоригт орсон улс орнуудад хангамж тасалдаж, хүмүүнлэгийн гамшиг үүсч болзошгүйг анхааруулжээ.

Үүнээс гадна Герман улс руу илгээсэн 3M компанийн амны хаалтны ачаа замаасаа чиглэлээ өөрчлөн Тайландаар дамжин АНУ руу илгээгдсэн тохиолдлыг өчигдөр Financial Times сонин олж мэдээлсэн байна.

Германы эмч, сувилагч нарт зориулагдсан нийт 200,000 амны хаалт ийнхүү замаасаа булаагдсаныг Берлиний эрх баригчид “орчин үеийн далайн дээрэмчний үйлдэл” гэж нэрлэж байгааг тус сонин мэдээлжээ.

Эх сурвалж: Business Insider