"Sony" компани амьсгалын аппарат үйлдвэрлэхээр болсноо мэдэгджээ

Эрүүл мэндийн яамны ээлжит хурлын үеэр Гадаад харилцаа, хамтын ажиллагааны хэлтсийн дарга Б.Янжмаа мэдээлэл өглөө. 

Тэрбээр" Сингапур улсын ЭМЯ –ны мэдээллээр өнгөрсөн хоногт халдварын тоо 447-гоор нэмэгдэж нийт 3,699 халдвар бүртгэгджээ. Батлагдсан тохиолдлуудын хавьтлуудыг илрүүлж шинжилгээ хийх тал дээр тус улс сайн ажиллаж байгаа.

Харин гэрийн карантинд байх ёстой хүмүүст өдөрт хэд хэдэн удаа байршлаа илтгэх мессэж явуулж, гэртээ байгаа эсэхэд нь хяналт тавьж ажиллаж байгаа аж.

Япон улсад өчигдөр шинээр 549 тохиолдол бүртгэгдсэний 127 нь Токио хотод бүртгэгдэж, нийт халдварын тохиолдлын тоо 8,700 давсан. Мөн тус өдөр 17 нас баралт шинээр бүртгэгдсэн. Одоогийн байдлаар 170 гаруй хүний биеийн байдал хүнд, эмнэлэгт хэвтэн эмчлүүлж байгаа. Нийт 1,546 хүн эдгэрч эмнэлгээс гарсан болохыг тус улсын ЭМЯ-наас нь мэдээлсэн.

Мөн тус улсын зарим томоохон ААН-үүд үйл ажиллагаагаа түр зогсоож хүмүүсийн бөөгнөрлийг үүсгэхгүй байхыг зорьж буй нь сайшаалтай. Амны хаалт, амьсгалын аппаратын үйлдвэрлэлийг нэмэгдүүлэх шаардлагатай талаар Япон улсын Ерөнхий сайд Абэ Шинзо томоохон компаниудын захирлуудтай цахим хурал хийх үеэр "SONY" компани улсынхаа бусад үйлдвэрлэгчидтэй хамтран амьсгалын аппарат үйлдвэрлэхээр болсноо мэдэгджээ.

Африк тивд халдварын шинж тэмдэг нэмэгдэж байна. Үүнтэй холбоотойгоор өмнөд Африкийн Бүгд найрамдах улс Ангол, Зимбабве зэрэг улс хөл хорио тогтоосон. Мөн Малави улс шинээр хөл хорио тогтоосон.

Португали улс тавдугаар сарын нэгэн хүртэл хөл хориогоо сунгахаа мэдэгдсэн" гэв.