Д.Нямхүү: Эсрэг биет илрэх нь тухайн вирусээр өвчлөөд эдгэрсэн гэсэн үг

"Сонгдо" эмнэлэгт үйлчлүүлж байсан хоёр иргэний лабораторийн шинжилгээ СӨРӨГ буюу шинэ коронавирусийн халдваргүй гарсан.

Мөн өчигдөр тухайн иргэдийг өвчлөөд эдгэрсэн байх магадлалыг судалж, эсрэг биет илрүүлэх шинжилгээг ХӨСҮТ-ийн лабораторид хийхэд СӨРӨГ гарсан байна. Өөрөөр хэлбэл, хоёр иргэн шинэ коронавирусийн халдваргүй, өвчлөөгүйг ХӨСҮТ-ийн ерөнхий захирал Д.Нямхүү хэлсэн юм. 

Харин тэрбээр эсрэг биет гэдгийн учрыг ийнхүү тайлбарлав.

ХӨСҮТ-ийн ерөнхий захирал Д.Нямхүү "Хүний биед вирус ороход дархлалын систем ажиллаж эхэлнэ. Уг дархлалын системд эсрэг биет үүсдэг. Жишээлбэл, COVID-19 вирус биед анх ороод ирэхэд дархлалын систем танихгүй боловч тодорхой хугацааны дараа түүнийг таньдаг, эсэргүүцэж чадах эсрэг биет үүснэ.

Вирус арилсан ч эсрэг биет үлддэг. Өөрөөр хэлбэл, энэ хүн тухайн өвчнөөр өвчлөөд эдгэрсэн гэсэн үг. Энэ бол вирус биш. "Сонгдо" эмнэлэгт үйлчлүүлсэн хоёр хүнийг шинжлэхэд эсрэг биет илрээгүй. Харин эдгэрсэн таван хүнд эсрэг биет байгаа нь тогтоогдсон" гэв.

Шинэ вирусийг дэлхий нийтээрээ судалж байна

Түүнчлэн эдгэрсэн хүмүүс дахин өвчлөх магадлалын талаар тайлбарлахдаа "Эсрэг биет үүссэн зарим тохиолдолд дахин өвчилдөггүй. Гэвч шинэ вирусийг дэлхий нийтээрээ судалж байгаа учраас хариулж чадахгүй" хэмээсэн юм.

Мөн халдварт өвчнөөс сэргийлэх хамгийн сайн арга нь арга вакцин буюу зохиомол дархлаа юм. Харин өвдөөд эдгэрэхэд хүнд байгалийн дархлаа үүсдэг аж. Байгалийн дархлаа болон зохиомол дархлаа хийснээр нийгмээрээ хамгаалалтад ордог гэж ХӨСҮТ-ийн ерөнхий захирал Д.Нямхүү хэллээ.