"Тээврийн хэрэгслийг тэгш, сондгойгоор хязгаарлах тухай асуудал одоогоор шийдэгдээгүй байна"

Энэ үеэр ЦЕГ-ын Нийтийн хэв журам хамгаалах, олон нийтийн аюулгүй байдлыг хангах албаны дарга, цагдаагийн хурандаа Ж.Амгалан мэдээлэл өглөө. Тэрбээр:

Гамшгаас хамгаалах тухай хууль хэрэгжиж байгаа үед иргэний хүлээх үүрэг тодорхой байгаа. Уг хуулийн 37.2-д Гамшгаас хамгаалах хууль тогтоомж, эрх бүхий албан байгууллагаас гаргасан тогтоол шийдвэрийг дагаж биелүүлэх тухай заасан байдаг. Тиймээс шийдвэрийг зөрчвөл Зөрчлийн хуульд зааснаар иргэнийг 150 нэгж буюу 150,000 төгрөгөөр торгох зохицуулалттай. Торгуулийн арга хэмжээг цагдаа, олон нийтийн цагдаа, мэргэжлийн хяналт, онцгой байдлын албан тушаалтнууд авах эрхтэй. 

Тусгаарлалтын байрнаас гарч байгаа иргэдийг шилжүүлэх журам өнөөдөр нарийвчлагдан гарна. Тухайлбал, тусгаарлах байрнаас монгол гэрт очвал өөрийгөө яаж тусгаарлах вэ, нэг өрөө байранд очвол яах вэ гэх мэтчилэн мэргэжлийн хяналт, эрүүл мэнд, онцгой байдлын байгууллага хамтран гаргаж байгаа.

Тусгаарлалтын байрнаас гарсан 13 иргэн эрэн сурвалжлагдаж байна хэмээн хэвлэлээр мэдээлж байгаа нь үндэслэлгүй мэдээлэл. Иргэдийн бүртгэл бүгд байгаа. Баян-Өлгий аймагт хоёр, Завханд нэг, Улаанбаатарт хоёр иргэн бичсэн хаягнаасаа өөр газар очсон тохиолдол гарсан.

Тиймээс бид цаашид тусгаарлалтаас гарахаас 2 хоногийн өмнө хаягийн бүртгэлийг аваад хаягаар нь очиж тодруулга хийх ба 48 цагийн өмнө аймаг, орон нутгийн Онцгой комисст нь нэрсийг урьдчилан явуулах замаар хянана. 

Тусгаарлалтаас гарсан иргэдийн дэглэм, хяналт сайн байгаа. Үүнд иргэдийн оролцоо ч мөн чухал. 

Улаанбаатар хотод 1,600 орчим олон нийтийн цагдааг ажиллуулахаар болсон. Энэ хүмүүс ажилдаа орж байгаа. Тиймээс энэ хүмүүсийн тавьсан шаардлагагыг биелүүлэхийг хүсэж байна. Энэ жишгээр бүх аймаг дахь баг, хороо, хэсгийн ахлагч нарыг ажиллуулна. Мөн цэргийн бүртгэлтэй үүрэгтнүүдийг дайчлахаар судалж байна. Одоогоо Дайчилгааны тухай хуульд тодруулах, нийцүүлэх асуудал байгаа тул түр хүлээж байгаа. 

Хөл хорио цээрийн дэглэм сахиулахад олон улсын туршлага судлаад цахим хэлбэрт шилжүүлэх талаар судалгаа хийж байна. Хэрэв үр дүнтэй байвал орон нутаг, нийслэлийн иргэдийг цахим картаар тодорхой маршрутаар ажилдаа явдаг, бусаад тэр маршрутаараа гэртээ ирдэг байдалд шилжих бэлтгэл ажлуудыг хийж байна.