“Эрэл”-ийн Б.Эрдэнэбатыг яллагдагчаар татав

Монголбанкнаас “Ариг” банкны эрхийг хязгаарлаж, хяналтдаа авах шуурхай үйл ажиллагааг энэ сарын 24-ний өдөр зохион байгуулсан. Шуурхай үйл ажиллагааны хүрээнд Монголбанкнаас бүрэн эрхт төлөөлөгч томилуулан Ариг банканд ажиллуулж эхлээд байгаа. Энэ талаар Монголбанкны Хяналт, шалгалтын газрын захирал Н.Батсайхан “Ариг” банк нь Монгол Улсын банкны системийн 0.3 хувийг эзэлдэг бөгөөд хоёр том хөрөнгө оруулагчтай. Хөрөнгө оруулагчид банкийг 61:39 хувиар эзэмшдэг байна. 2019 оны эцсийн тайлангаар “Ариг” банк Монголбанкнаас тогтоож өгсөн төлбөр гүйцэтгэх чадварын зохистой харьцаа хэвийн байгаа юм байна. Харин Монголбанкны ерөнхийлөгчөөс өгсөн үүргийн дагуу өөрийн хөрөнгөө нэмэгдүүлээгүй бөгөөд ямар нэгэн шийдвэр гаргахгүй байгаа нь хувь нийлүүлэгчдийн хурлаа хийж чадахгүй байгаагаас ТУЗ-өө бүрэн томилж чадаагүй байгаа аж. Өөрөөр хэлбэл Зохистой засаглал алдагдсан тул “Ариг” банканд нөхцөлт удирдлага томилсон” гэсэн юм. Мөн Төв банкнаас гаргасан мэдэгдэлд “Ариг" банк Монголбанкны Ерөнхийлөгчийн өгөгдсөн үүрэг даалгаврыг биелүүлээгүй, хувь нийлүүлэгчдийн хооронд маргаан үүссэнээс хувьцаа эзэмшигчдийн хурлаар маргаантай асуудлаа шийдвэрлэж чадахгүй төлөөлөн удирдах зөвлөл эрх зүйн чадамжгүй болсон тул зохисгүй засаглал алагдсан. Иймд Монголбанкны Ерөнхийлөгчийн 2020 оны нэгдүгээр сарын 24-ний өдрийн тушаалаар харилцагч, хадгаламж эзэмшигчдийн хөрөнгөөс хамгаалах үүднээс Банкны тухай хуульд заасны дагуу нөхцөлт удирдлагын арга хэмжээг хэрэгжүүлэхээр боллоо. Ариг банкнаас ирүүлсэн мэдээллээр 2019 оны эцсийн байдлаар тус банк Монголбанкнаас тогтоосон өөрийн хөрөнгө, төлбөр түргэн гүйцэтгэх чадварын зохистой харьцааг хангаж байна. Бүрэн эрхт төлөөлөгч нь Ариг банкны үйл ажиллагааг хүлээж авсан бөгөөд нэгдүгээр сарын 27-ны өдрөөс эхлэн үйл ажиллагаа хэвийн үргэлжилж байна” гэж дурдсан байна.

Хуучны “Эрэл” банк нэрээ өөрчилж, 2014 оноос “Ариг” нэрээр үйл ажиллагаа явуулж эхэлсэн бөгөөд нийслэл болон аймгуудад салбараа нээн ажиллаж байгаа юм. Тэгвэл “Эрэл” группын үүсгэн байгуулагчид болох Д.Эрдэнэбат, түүний эхнэр Д.Сэргэлэн нарыг гэрч, хохирогчдын мэдүүлэгт үндэслэн яллагдагчаар татах тогтоол гарсан байна. Д.Эрдэнбат нь бусдыг “Ариг” банканд хөрөнгө оруулахад ятгаж, 20 гаруй тэрбум төгрөгийг өөрийн хувийн дансанд шилжүүлэн авсан бөгөөд үүнийгээ банкны дүрмийн санд оруулаагүй нь нотлогдсон ажээ. Энэ нь бусдын эд хөрөнгийг залилан мэхлэх замаар луйвардаж авах гэсэн хуулийн зүйлчлэл бүхий эрүүгийн хэрэгт тооцогддог байна.

Одоогоос дөрвөн сарын өмнө түүнийг яллагдагчаар татаж байжээ

"Эрэл" группын Ерөнхий захирал Б.Эрдэнэбатад залилан, луйвар болон мөнгө угаалтын хэргээр эрүүгийн хэрэг үүсгэж, яллагдагчаар татах хүсэлтийг одоогоос дөрвөн сар гаруйн өмнө буюу 2019 оны есдүгээр сард прокурорт гаргаж байжээ. Б.Эрдэнэбат нь Хас, Хаан, Хөгжлийн банкуудад асар их хэмжээний өртэй байгаагаас барьцааны зарим хөрөнгийг нь хураах шүүхийн шийдвэр гарсан. Мөн бусдаас хөрөнгө оруулалт нэрээр олон арван тэрбум төгрөг залилан мэхэлж авсан асуудлаар шалгагдаж байсан юм.

Эл асуудлыг Прокурор үндэслэлтэй гэж үзсэн тул тухайн үед нь Б.Эрдэнэбатад яллагдагчаар татах тогтоолыг танилцуулсан ч Б.Эрдэнэбат цагдаагийнхантай зүй бус харьцаж, улс төрийн болон прокурорын өндөр албан тушаалтнуудын нэр барин тэр дарга энэ дарга “удахгүй намайг цагаатгана, суллана, хэрэгсэхгүй болгоно” гэж байжээ. Тухайн үеийн Монголбанкны ерөнхийлөгч Н.Баяртсайханы зүгээс “Ариг” банкны Дүрмийн санг нэмэгдүүлэх, банкны үйл ажиллагааг хуульд нийцүүлэн ажиллуулах талаар шаардлага хүргүүлж байсан ч Б.Эрдэнэбат шаардлагыг биелүүлэх эрх зүйн болон хөрөнгийн чадваргүй болоод байгаа юм” гэсэн мэдээлэл гарч байжээ.