Жилийн дотор задардаг шинэ лонх хуванцрын хэрэглээг халж магадгүй болжээ

Удахгүй бүх төрлийн хүнс ургамлын гаралтай материалаар үйлдвэрлэгдсэн лонх, хайрцагт савлагдаж магадгүй болжээ.

Нидерландын био химийн компани Аvantium ургамлын гаралтай чихрээр үйлдвэрлэсэн савыг хэрэглээнд нэвтрүүлэхээр хөрөнгө оруулалт татаж эхэлсэн байна.

Томоохон компаниудаас шар айраг үйлдвэрлэгч Карлсберг компани уг төслийг дэмжиж, бүтээгдэхүүнээ шинэ савалгаанд шилжүүлэхээр болжээ.

Шинэ лонх нь хатуу цаасан гадаргуутай байх бөгөөд дотор талыг нь ургамлын гаралтай шинэ материалаар бүрсэн байх юм.

Хөрөнгө оруулалт босгох ажил энэ оны сүүлээр дуусна гэж төсөөлж байгаагаа Avantium компанийн гүйцэтгэх захирал Том Ван Акен ярьжээ.

Төслийг бас Coca-Cola, Danone компаниуд дэмжихээ илэрхийлээд байна.

Хүн төрөлхтний өмнө тулгараад буй олон асуудлуудын нэг нь хуванцрын бохирдол юм.

Жил бүр дэлхий даяар 300 сая тонн орчим хуванцар хаягдал бий болдог нь байгаль орчны бохирдлын нэг гол хүчин зүйл болж байна.

Уг хаягдлаас үүсдэг бичил хуванцрууд нь байгальд бүрэн шингэх хүртлээ хэдэн зуун жил болдог байна.

Ургамлын гаралтай шинэ сав нь зориулалтын технологиор нэг жилийн дотор бүрэн задардаг бол байгальд хаягдсан тохиолдолд цөөн хэдэн жилийн хугацаанд бүрэн задарч байжээ.

Аvantium компани эхэндээ жил бүр 5,000 тонн ургамлын гаралтай савыг эрдэнэшиш, буудай, манжин зэргээс гаргаж авсан чихрээр үйлдвэрлэх юм байна. Цаашдаа зах зээлийн эрэлтийг даган үйлдвэрлэлээ өсгөхөөр төлөвлөжээ.

Дэлхийн хүнсний хангамжид сөргөөр нөлөөлөхгүйн тулд ургамлын хаягдлаас түүхий эдээ гаргаж авахаар төлөвлөж байгаагаа Avantium компани мэдээлсэн юм.

Шинэ савалгаатай хүнсний бүтээгдэхүүнүүд 2023 онд дэлгүүрийн лангуунд тавигдах төлөвтэй байна.

Эх сурвалж: The Guardian