Alcoa: Хөнгөн цагааны ханш нэмж буурах эрсдэл бий

Дэлхийн хөнгөн цагаан үйлдвэрлэлийн томоохон компаниудын нэг, АНУ-д төвтэй “Алкоа”-ийн Гүйцэтгэх захирал Roy Harvey дэлхийн эдийн засгийн сэргэлтийн талаар сөрөг үзэл бодолтой байгаагаа металл, уул уурхайн нэгэн цахим хурлын үеэр мэдэгджээ. Тэрээр сэргэлтийн талаар дүгнэлт хийхэд олон зүйл тодорхойгүй гэж үзэж байна.

Хөнгөн цагаан нь аж үйлдвэрийн голлох металл бөгөөд Лондоны металлын бирж дээр он гарснаас хойш 20%-аар ханш нь буураад байгаа юм. Шинэ коронавирусийн нөлөөгөөр хамгийн их цохилтод өртөж буй салбарын нэгээр хөнгөн цагааны салбар нэрлэгдэж байна.

Яг одоогийн байдлаар дэлхийн олборлогчид эрэлтээсээ илүү их бүтээгдэхүүн нийлүүлж байгаа бөгөөд цаашид үйлдвэрүүд гарцаа танах шаардлагатай болно гэдгийг Roy Harvey мэдэгджээ. Мөн нийлүүлэлтийн илүүдэл нь ханшийг улам бууруулах нөхцөл болж буйг тэмдэглэсэн байна.

Улс орнууд шинэ коронавирусийн тархалтаас сэргийлсэн хөл хорионы дэглэмийг сулруулж эхлээд байгаа ч эдийн засаг төдийлөн хурдан сэргэхгүй гэдгийг эдийн засагчид сануулах боллоо. Бидний өмнө найдаж хүлээж байсан V хэлбэрийн буюу богино хугацаанд бий болох огцом өсөлт энэ удаад зөвхөн мөрөөдөл болон үлдэж мэдэхээр байгаа ажээ.

Harvey “Одоогийн тодорхойгүй нөхцөл байдалд компаниуд үйлдвэрээ дахин нээхгүй гэж шууд хэлэхгүй. Гагцхүү үйлдвэрүүдийг нээхэд шаардлагатай эерэг нөхцөл байдал үүссэн эсэх нь тодорхойгүй байгаа”-г онцолжээ.

Он гарснаас хойш Нью-Йоркийн хөрөнгийн бирж дээр “Алкоа” компанийн хувьцааны үнэ 70%-аар буурч 6.81 ам.долларын ханштай болоод байгаа юм.

Хятадын эдийн засаг оны эхний улиралд 6.8%-аар доошилж хасах үзүүлэлттэй гарсан ч хоёрдугаар улиралд хөл хорио тавигдаж, үйлдвэрүүд ажиллах болсноор буцаад сэргэж эхлээд байна. Гэсэн ч АНУ-ын мужууд болон Европын холбооны улс орнуудад нөхцөл байдал хэрхэн өрнөхийг харах шаардлагатай гэж Harvey илэрхийллээ.