Шинэ үеийн залуусын 80 хувь нь сонгууль өгнө

SICA судалгаа, зөвлөх үйлчилгээний байгууллага өмнө нь “Монголын нийгмийн үеүдийг тодорхойлох нь” судалгааг хийж үр дүнг нээлттэйгээр олон нийтэд танилцуулсан билээ.

Энэхүү судалгаагаар 1995 оноос хойш төрсөн залуусыг “шинэ үеийнхэн” тодорхойлсон. Уг судалгааны үргэлжлэл болгон “Шинэ үеийнхний улс төр, сонгуулийн идэвх, оролцоо” хэмээх судалгааг хийж гүйцэтгэлээ. Шинэ үеийхэн буюу 18-25 насныхан 2020 оны сонгууль өгөх нийт сонгогчдын 17.2 хувийг (379.1 мян) эзэлж байгаа юм. Иймд эдгээр насны залуучуудын идэвх оролцоо сонгуулийн үр дүнд тодорхой хэмжээнд нөлөөлөл үзүүлэх нь тодорхой.

Анх удаа сонгууль өгөх болон хоёр дахь удаагаа сонгууль өгөх залуучуудын улс төрийн чиг хандлага, сонгуулийн үйл ажиллагаанд хандаж буй хандлагыг судалж  үр дүнг танилцуулж байна.  Судалгаанд Улаанбаатар хот, 21 аймгийн 1,000 шинэ үеийн төлөөллийг хамруулсан. Мөн шинэ үеийнхний улс төр, сонгуулийн оролцоо, улс төрийн сэтгэл ханамж, үнэт зүйлс, итгэлцэл, мэдлэг зэрэг өмнө нь манайд хийгдэж байгаагүй олон шинэ судалгааны сэдвүүдийг хөндсөн.  Судалгаанаар шинэ үеийнхний сонгуулийн идэвхээс гадна төр засгийн талаарх санаа бодол, УИХ-ын сонгуульд хэрхэн оролцох, урьдчилсан байдлаар мэдэгдэж буй сонголт, сонгуулийн хүлээлт зэргийг тодруулсан байна.

Зураг 1. Шинэ үеийн залуусын 2020 оны УИХ-ын сонгуульд санал өгөх эсэх, хувиар

Нийт судалгаанд оролцогчдын 80 хувь нь 2020 оны УИХ-ын сонгуульд санал өгөх бол 6 хувь нь санал өгөхгүй гэсэн байна. Харин 14 хувь хараахан шийдээгүй буюу тухайн үеийн нөхцөл байдлаас шалтгааж шийдвэр гаргах хандлагатай байлаа.  

Зураг 2. 2020 оны УИХ-ын сонгуульд санал өгөх эсэхийг 2016 онтой харьцуулбал, хувиар

2016 оны сонгуульд саналаа өгсөн залуучуудын 85.3 хувь нь энэ удаагийн сонгуульд дахин саналаа өгөхөөр, 5.7 хувь нь өгөхгүй байхаар шийдсэн байгаа бол 9 хувь нь хараахан шийдээгүй байсан. Харин 2016 онд саналаа өгч амжаагүй оролцогчдын 62.5 хувь нь саналаа өгнө, 9.6 хувь нь өгөхгүй, 27.9 хувь нь шийдээгүй гэж хариулсан. Энэ удаагийн УИХ-ын сонгуульд анх удаа санал өгөх залуучуудын хувьд 79.5 хувь нь санал өгнө, 5.5 хувь нь өгөхгүй гэсэн бодолтой байгаа бол 15 хувь нь өгөх эсэхээ шийдээгүй байлаа.

Судалгаанд оролцсон шинэ үеийнхий хувьд сонгогдоосой гэж хүсэж буй нэр дэвшигчийн  хүйсийг чухалчилж авч үзээгүй бөгөөд харин 78 хувь нь 25-40 хүртэлх насны нэр дэвшигчийг дэмжих хандлагата байсан. Тухайлбал 25-35 настай залуу нэр дэвшигчийг шинэ үеийнхний 51 хувь нь дэмжих хандлагатай байна.

Зураг 3.  Сонгогчдын хүлээлт, нийгэмд эзлэх байр сууриар, хувиар

Судалгааны үр дүнгээр шинэ үеийн сонгогчдыг 2020 онд ямар үзэл, хандлагын үүднээс хэрхэн оролцох гэж байгааг тандан кластерийн шинжилгээ хийж нийт есөн бүлэгт ангилан авч үзсэн. Улмаар тэрхүү бүлэг тус бүрийн төр засгийн болон сонгуулийн талаарх санаа бодол, улс төрийн оролцооны төлөв байдлын онцлогуудыг гарган тавихаар оролдсон болно. Ингэхдээ дараах байдлаар бүлэгт хуваарилан дүгнэлт хийсэн. Үүнд:

●      2016 онд сонгууль санал өгсөн оролцогчид энэ удаа дахин сонгууль өгөхөөр бол 1-р бүлэг, санал өгөхөө шийдээгүй бол 6-р бүлэг, сонгуульд оролцохгүй бол 7-р бүлэгт тус тус хуваасан

●      2016 онд сонгуульд оролцоогүй оролцогчид энэ удаа сонгууль өгөхөөр бол 3-р бүлэг, санал өгөхөө шийдээгүй бол 5-р бүлэг, сонгуульд оролцохгүй бол 9-р бүлэгт тус тус багтсан болно.

●      2016 оны сонгуулийн үеэр насанд хүрээгүй байсан шинэ оролцогчид сонгууль өгөхөөр бол 2-р бүлэг, санал өгөхөө шийдээгүй бол 4-р бүлэг, сонгуульд оролцохгүй бол 8-р бүлэгт тус тус ангилагдсан юм.

Мөн судалгаанд оролцогчдын хувьд улстөрийн ердийн мэдлэгийг тодорхойлсон. Ингэхдээ түгээмэл хэрэглэгддэг арга болох улстөрчдийн нэрсийг асууж тооцсон. Шинэ үеийн залуучуудаас Монгол Улсын Ерөнхийлөгч болон УИХ-ын дарга, Ерөнхий сайд, тойргоос сонгогдсон УИХ-ын гишүүдийн нэрсийг асуусан. Мөн түүнчлэн дэмждэг болон дургүй улс төрчдийнх нь талаарх санаа бодлыг тодрууллаа. Шинэ үеийнхний 59.6 хувь нь дэмждэг улс төрч байхгүй эсвэл нэрлэж мэдэхгүй байсан бол 70 хувь нь “дургүй улс төрч байхгүй”, “нэрлэж мэдэхгүй байна” хэмээн хариулж байсан. Энэ нь шинэ үеийнхний 60 хувьд нь улс төрийн орчны талаар эерэг, сөрөг ямар ч мэдрэмж байхгүй, иргэний хувьд улс төрийн хариуцлагын талаарх төсөөлөл үгүй байгааг харуулж байна.  

Судалгааны дэлгэрэнгүй үр дүнтэй танилцахыг хүсвэл бидэнтэй холбогдоорой.

Судалгаа, зөвлөх үйлчилгээний SICA компани

Утас: 70126009

Email: information@sica.mn

FB: SICA Mongolia