Цар тахлын хүндрэлийг давахаар ОУВС-аас $100 саяын санхүүжилт авах хэлэлцээр хийжээ

Цар тахлаас үүдэлтэй эдийн засгийн хүндрэлийг давах зорилгоор $100 саяын санхүүжилт авах болон бусад улс оронтой хамтран ажиллах талаар ОУВС-тай яриа хэлэлцээрийг амжилттай хийж дуусгасан талаар Сангийн сайд Ч.Хүрэлбаатар өөрийн цахим хуудсаараа дамжуулан мэдээлжээ. 

Манай албаны хүмүүс тавдугаар сарын 11-13-нд ОУВС-тай 100 сая ам.долларын санхүүгийн тусламж хүсэх талаар хэлэлцсэн байна. Гол зорилго нь COVID-19 цар тахлын эдийн засаг дахь нөлөөллийг бууруулж, тогтвортой байдлыг хангах, эргэн сэргэхэд зарцуулах аж. Харин эцсийн шийдвэрийг ОУВС-ийн Захирлуудын зөвлөл ирэх зургаадугаар сарын эхээр гаргах юм байна. 

Манай улс өнгөрсөн гурван жилийн хугацаанд ОУВС-ийн Өргөтгөсөн санхүүжилтийн хөтөлбөрт хамрагдсан бөгөөд энэ сарын 23-нд хөтөлбөр дуусаж байгаа юм. Энэхүү хөтөлбөрийн үр дүнд Монгол Улс энэ удаагийн цар тахлын эсрэг яаралтай хариу арга хэмжээ авах нөөц боломжтой болсон хэмээн ОУВС үзэж байна. 

Цаашид тус сангийн хөтөлбөрт дахин орохоор мөн хэлэлцэж байгааг Сангийн сайд өмнө нь мэдээлсэн билээ.