Өнгөрсөн сард Польш улсын цэргүүд Чехийн нутгийг хэсэг хугацаанд булаан эзэлжээ

Өнгөрсөн сарын сүүлээр Польш улсын цэргүүд санамсаргүй хөрш Чехийн нутагт нэвтэрч, хэсэг хугацаанд байрласныг хоёр улсын гадаад хэргийн яамд өчигдөр мэдээлсэн байна.

Европын улсуудын хоорондын хилийг хүмүүс бараг анзаардаггүй, иргэд нь чөлөөтэй зорчиж байдаг. Харин коронавирусийн цар тахлын улмаас тус тивийн улсууд хилээ хааж, гадаадын иргэдийг нэвтрүүлэхээ болиод байгаа.

Польшийн цэргүүд тавдугаар сарын сүүлээр санамсаргүй Чехийн хилийг давж, хэсэг газрыг эзлэн суугаад тэнд байдаг сүм рүү очих гэсэн чех хүмүүсийг буцааж эхэлжээ.

Энэ явдлыг түрүүлж мэдсэн Чехийн тал Варшав дахь элчин сайдаараа дамжуулан Польшийн эрх баригчдад мэдээлсэн байна.

Үүний дараа Польш улс цэргүүдээ татаж, энэ нь алдаа байсныг Чехийн талд албан бусаар мэдэгдэж байжээ.

Гэвч Чехийн гадаад хэргийн яам албан ёсны тайлбар өгөхийг Польшийн засгийн газраас шаардаад хариу хүлээж байгаагаа Баасан гарагт мэдээлсэн байна.

Польшийн батлан хамгаалах яам ийм эндүүрэл гарсныг өчигдөр бас хүлээн зөвшөөрчээ. Дээрх хэрэг Польшийн өмнөд хилийн Пелгрзимов хэмээх жижиг тосгоны ойролцоо болсон байна.

Энд хүн ам сийрэг суудаг, хөл хөдөлгөөн багатай нэг замаар хоёр улс хилийн шугамаа тогтоосон байдаг гэнэ.

Цэргүүд нь хэр урт хугацаанд Чехийн нутагт байсан талаар Польшийн тал мэдээлэхээс татгалзсан байна.

Хоёр улсын хооронд 20 дугаар зууны эхээр хэд хэдэн удаа хилийн зөрчил мөргөлдөөн гарч байжээ. 1919 онд тэд Силезийн газар нутгийг булаацалдан долоо хоног дайтаж байсан бол 1938 онд энэ бүсийн Бохумин хот орчмын газрыг Польш улс өөртөө нэгтгэж байсан юм.

Эх сурвалж: CNN