Лондон хотод болох жагсаалын өмнө Черчилийн хөшөөг хайрцаглан хамгаалжээ

Өнөөдөр буюу Бямба гарагт Их Британийн нийслэл Лондон хотод томоохон эсэргүүцлийн жагсаал болох юм. Энэ үйл явдлыг угтуулан эрх баригчид Уинстон Черчиль зэрэг хэд хэдэн түүхэн хүмүүсийн хөшөөг хайрцаглан бэхэлжээ.

АНУ-д гарсан Жорж Флоидын аллагаас үүдэлтэй арьс өнгөний үзлийн эсрэг хөдөлгөөн нь Британийн империализмийн түүхтэй холбоотой хүмүүсийн хөшөөнд халгаатай байгаа.

Өнгөрсөн Ням гарагт тэмцэгчид Бристол хот дахь Эдвард Колстоны хөшөөг буулгаж, голын усанд живүүлсэн юм. Колстон нь 17 дугаар зуунд боолын худалдаанаас асар их ашиг олсон хүн гэгддэг.

Долоо хоногийн өмнө парламентын ордны эсрэг талд оршдог Черчилийн хөшөө рүү жагсагчид будаг цацаж байжээ.

Тухайн үед Британийн ерөнхий сайд Борис Жонсон “Үндэсний хөшөө дурсгалууд маань үймээн самуун дэгдээгчдийн халдлагад өртөх болсон нь утга учиргүй, ичгүүртэй хэрэг юм” гэж твиттер хуудсандаа харамсан бичиж байв.

Лондон хотын цагдаа өнөөдөр гудамж талбайд хяналтаа нэмэгдүүлж, оройн 5:00 цагт жагсаалаа дуусгах хугацааг зохион байгуулагчдад өгөөд байна.

Борис Жонсон нь Уинстон Черчилийг хүндэлдэг, намтрыг нь бичиж байсан бөгөөд хэв маягийг нь дуурайж, адилхан байхыг хичээдэг гэсэн яриа бий.

Гэхдээ Черчиль арьс өнгөний үзэл, жүүдийн эсрэг үзлээ илэрхийлж байсан түүхэн баримтууд байдаг. 1943 онд тэр Энэтхэгт өлсгөлөнгийн улмаас хоёр сая гаруй хүн нас барахад хоол хүнс нийлүүлэхээс татгалзаж байсан гэж буруутгагддаг юм.

“Тиймээ. Тэр заримдаа өнөөдрийн өнцгөөс харахад зохимжгүй үзэл санаа илэрхийлдэг байсан. Гэхдээ тэр бол баатар, хөшөө дурсгалаа босгуулах гавьяатай хүн. Бид өнгөрсөн үеээ засварлах, хааж хориглох боломжгүй. Бид өөр түүхтэй хүмүүс болж жүжиглэх шаардлагагүй” гэж Борис Жонсон бичиж байжээ.

Эх сурвалж: Reuters