Р.Батсүх: Тавантолгой-Зүүнбаянгийн төмөр замаар анхны галт тэргийг 12 сард явуулахаар ажиллаж байна

Монгол орны зүүн өмнөд хязгаарт орших Дорноговь аймагт өнгөрсөн оны тавдугаар сарын 24-нд Тавантолгой-Зүүнбаян чиглэлийн 414.6 км төмөр замын төслийн бүтээн байгуулалтын ажил эхэлсэн билээ.

Тэгвэл энэ сарын 13-ны өдөр Тавантолгой-Зүүнбаян чиглэлийн эхний 50 дахь километр төмөр замыг барьж дуусгажээ. Бид энэхүү бүтээн байгуулалттай танилцаж, сурвалжилсан юм.

“Төмөр замыг барьж байгуулснаар Тавантолгой уурхайгаас коксжих нүүрс экспортлох, уул уурхайн ба аж үйлдвэрийн бүтээгдэхүүний тээвэрлэлт, экспортыг нэмэгдүүлж, бүс нутгийн нийгэм эдийн засгийн хөгжлийг дэмжих зорилготой. Ингэхдээ жилд 15 сая тонн ачаа тээвэрлэх боломж бүрдэх юм. 

Мөн Тавантолгой нүүрсний уурхайн коксжих нүүрсийг ОХУ, БНХАУ руу экспортлох шинэ гарц бий болгох юм. Ингэхдээ жилд 15 сая тонн ачаа тээвэрлэх боломж бүрдэнэ. Уг төмөр замын трассын дагуу Цагаан суварга, Хармагтай, Манлай зэрэг нүүрс, төмөр, зам, цайрын томоохон орд газрууд байрлаж буй нь Монголын уул уурхайн экспортод голлох нөлөөг үзүүлэх төмөр замын чиглэл болно хэмээн үздэг. Тэр ч байтугай төмөр замын шугамыг барьж, одоо байгаа дотоодын төмөр замын сүлжээгээр дамжуулан Орос, Хятадын төмөр замын сүлжээнд холбогдох, цаашилбал далайн боомтуудад хүрэх бөгөөд уул уурхайн бүтээгдэхүүнийг Хятад, Солонгос, Японы зах зээлд хүргэх боломжтой.

"БИД АНХНЫ ГАЛТ ТЭРГИЙГ АРВАНХОЁРДУГААР САРД БАГТААН ЯВУУЛАХ ЗОРИЛГО ТАВИН АЖИЛЛАЖ БАЙНА"

“Тус төмөр зам нь Өмнөговь аймгийн Цогтцэций, Манлай болон Дорноговь аймгийн Мандах, Сайншанд сумын Зүүнбаян багийн нутаг дэвсгэрийг дамнасан нийт 414.6 км урт, нэг өртөө, зургаан зөрлөгтэй байх юм. Өнөөдрийн байдлаар 414.6 км төмөр замын бүтээн байгуулалтын газар шорооны ажлын 85.6 хувийг хийж гүйцэтгээд байна. 

Мөн хоолойн ажил 60.7%, гүүрийн ажил 27.4%, нэг өртөө, зургаан зөрлөгийн барилгын ажил 38.3%-тай үргэлжилж явна. Үүнээс гадна газар шорооны ажлын талбарт 78 ААН-ийн 6,153 хүн, 2,871 орчим машин механизмын хүчин чадалтайгаар ажиллаж байгаа билээ.

Төмөр замын доод бүтцийн ажил /далан, ухмал, хоолой.../ долдугаар сарын 1-нд бүрэн дуусна. Энэ оны батлагдсан төлөвлөгөөгөөр бид анхны галт тэргийг арванхоёрдугаар сард багтаан явуулах зорилго тавин ажиллаж байна. Санхүүжилтийн хувьд Засгийн газрын тогтоол шийдвэрээр асуудалгүй явна гэж ойлгож байгаа” хэмээн "Монголын төмөр зам" ТӨХК-ийн гүйцэтгэх захирал Р.Батсүх ёслолын ажиллагааны үеэр онцолсон юм.

ТӨМӨР ЗАМЫН БҮТЭЭН БАЙГУУЛАЛТЫН ЭХНИЙ ЭЭЛЖИЙН САНХҮҮЖИЛТ 750 ТЭРБУМ ТӨГРӨГИЙН ӨРТӨГТЭЙ

Тус чиглэлийн төмөр замын бүтээн байгуулалтын санхүүжилтийг дотоодоос шийдэж буй бөгөөд эхний ээлжийн санхүүжилтийг “Монголын төмөр зам” ТӨХК 20 жилийн хугацаатай, 750 тэрбум төгрөгийн үнэ бүхий үнэт цаас гарган санхүүжүүлж буй юм. 

Үүнээс гадна тус төмөр зам нь нийт 1,520 мм царигтай ба гол даац нь 25 тонн. Мөн 582 хоолой, 27 гүүр тавин 430 км шугам татаж, хагас автомат дохиолол төвлөрүүлэлт хориглолын систем бүхий суурь бүтцийн байгууламжийг барьж буй тухайгаа замчид хэлж байв. 

ТӨМӨР ЗАМЫН БҮТЭЭН БАЙГУУЛАЛТЫН АЖИЛД 76 ААН БОЛОН ЗЭВСЭГТ ХҮЧНИЙ ДӨРВӨН АНГИ ОРОЛЦОЖ БАЙНА

Төмөр замын доод бүтцийн ажлын ерөнхий гүйцэтгэгчээр Зэвсэгт хүчний жанжин штаб, дээд бүтцийн ажлын гүйцэтгэгчээр “Улаанбаатар төмөр зам” ХНН ажиллаж байгаа билээ. Тодруулбал,

• Өмнөговь аймгийн Цогтцэций талаас 11  
• Дорноговь аймгийн Мандах сумын нутагт 8  
• Дорноговь аймгийн Зүүнбаян талаас 9 аж ахуйн нэгж тус тус
• Дээрх болон бусад хэсэгт Зэвсэгт хүчний 7781, 7782, 110, 339 дугаар ангийн цэрэг, офицерууд үүрэг гүйцэтгэн, цалинтай ажиллаж буй нь энэхүү түүхэн бүтээн байгуулалтын бас нэгэн онцлог мөнөөс мөн. 

"ИРЭХ ЖИЛИЙН ЗУРГААДУГААР САР ГЭХЭД 414.6 КМ ТӨМӨР ЗАМЫГ АШИГЛАЛТАД ОРУУЛНА ГЭСЭН ЗОРИЛТТОЙГООР МАНАЙ ЗАМЧИД АЖИЛЛАЖ БАЙНА"

Бүтээн байгуулалтын ажилтай танилцаж байх үедээ Монгол Улсын Ерөнхий сайд У.Хүрэлсүх “Бид өнгөрсөн жил нефтийн үйлдвэрийн төмөр замаа тавьж, ашиглалтад оруулсан. Монголчууд өөрсдөө төмөр замаа тавьж чаддаг боллоо. Зэвсэгт хүчний анги салбар, бие бүрэлдэхүүн үндэсний аж ахуйн нэгж компаниуд хамтран ажиллаж, өөрсдөө төмөр замаа тавьж буй нь асар том ажил юм. Тавантолгой-Зүүнбаян чиглэлийн төмөр зам нь Монгол орны эдийн засагт асар их үр өгөөжөө өгөх зам. Өнөөдөр суурийн дэд бүтэц болох 200 км, дээр нь төмөр замаа тавьсан 50 км-ийг хүлээж авч байгаадаа сэтгэл өндөр байна.

Энэ зам дагуу зүүн талын босоо тэнхлэгийн томоохон боомт бий болох юм. Төмөр зам бол улсын хөгжил дэвшлийн төмөр судас. Тиймээс бид улс орноо авто зам, төмөр замаар холбох ёстой. Энэ том бүтээн байгуулалтын ажил үр дүнгээ өгч байгаад баяртай байна. Богино хугацаанд, байгаль орчны хүндрэлтэй нөхцөл байдалд ч өдөр өнжилгүй ажиллаж, чанарын өндөр түвшинд хийж гүйцэтгэснийг хараад бахархаж байна. Ирэх жилийн зургаадугаар сар гэхэд 414.6 км төмөр замыг ашиглалтад оруулна гэсэн зорилттойгоор манай замчид ажиллаж байна. Энэ нь манай улсын хувь том, түүхэн бүтээн байгуулалт юм" гэв.  

"ЭНЭХҮҮ ТӨМӨР ЗАМЫН НӨЛӨӨГӨӨР УУЛ УУРХАЙН САЛБАРЫН ЭДИЙН ЗАСАГ 2-3 ДАХИН ТЭЛНЭ"

Уул уурхай хүнд үйлдвэрийн яамны цахим хуудсаас зургийг ашиглав

Мөн Уул уурхайн хөнгөн үйлдвэрийн сайд Д.Сумъяабазар “Хоёр жилийн хөдөлмөрийн үр дүнд энэ бүтээн байгуулалт босгох хөрөнгө санхүү, хуримтлалыг бий болгож чадсан нь сайн хэрэг. Энэхүү төмөр зам нь үнэхээр Монголын эдийн засгийг тэлэх гол судас. 

Төмөр замаар дамжуулан уул уурхайн салбарын эдийн засаг 2-3 дахин тэлнэ гэдэг нь манай улсын эдийн засаг мөн 2-3 дахин өсөх боломж үүснэ гэсэн үг. Монгол Улс өнөөдөр уул уурхайгаа хариуцлагатай, зөв явуулбал иргэдийн амьдралд үр өгөөжтэй. Тэгэхээр энэ салбар, цэгцтэй хариуцлагатай байж, улсын эдийн засаг сахилга баттай байна. Бүх зүйл энэ салбараас уялдаатай гэдгийг онцлон хэлмээр байна. Энэхүү бүтээн байгуулалтын ажилд уул уурхайн салбарынхны зүгээс талархаж байгаагаа хэлмээр байна” гэв.  

Ийнхүү цаашид улс орны эдийн засгийг дэмжих гол тулгуур болсон 414.6 км төмөр замын бүтээн байгуулалтын ажил эрчимтэй үргэлжилж байна.