Их Британи “Huawei” компанитай хамтран ажиллана

ЛОНДОН. /BBC/. Их Британи АНУ-ын шахалтыг үл харгалзан “5G” сүлжээндээ БНХАУ-ын харилцаа холбооны технологийн “Huawei” компанийн тоног төхөөрөмжүүдийг үргэлжлүүлэн ашиглахаар болсон хэдий ч зарим хязгаарлалтыг тогтоожээ.

Уг шийдвэврийн дагуу “Huawei” компанийг “5G” сүлжээний “эмзэг хэсгүүд”-ийг нийлүүлэхийг хориглосон бөгөөд сүлжээний тоног төхөөрөмжийн 35 хувийг бүрдүүлэхийг зөвшөөрчээ. Мөн цэргийн бааз, цөмийн талбайн ойролцоох газруудад ашиглахыг хориглох ажээ.

Их Британийн Засгийн газрын мэдээлснээр, Ерөнхий сайд Борис Жонсон шийдвэрээ тайлбарлахаар АНУ-ын Ерөнхийлөгчтэй ярьжээ. Б.Жонсон зах зээлийг төрөлжүүлж, цөөн компанийн давамгайллыг зогсоохын тулд ижил байр суурьтай орнууд хамтран ажиллах хэрэгтэй хэмээн үзсэн ажээ.

“Huawei” компанийн тоног төхөөрөмжийг хэрэглэснээр тагнуулын эрсдэл учирна гэж АНУ-ын Төрийн нарийн бичгийн дарга Майк Помпео өмнө нь мэдэгдсэн юм. Харин Их Британийн Гадаад хэргийн сайд Доминик Рааб мэдэгдэхдээ, бидний шийдвэр АНУ тэргүүтэй бусад холбоотонтой мэдээлэл солилцоход нөлөө үзүүлэхгүй гэжээ.