ОХУ-ын ганцхан бүс нутаг үндсэн хуулийн өөрчлөлтийг эсэргүүцжээ

Сүүлийн өдрүүдэд ОХУ даяар үндсэн хуулийн өөрчлөлтийн талаар бүх нийтийн санал асуулга явагдаж өндөрлөсөн билээ.

Уг өөрчлөлтийн гол заалт нь Владимир Путинд дахин хоёр удаа ерөнхийлөгчөөр сонгогдон ажиллах боломж олгох байв. Өөрөөр хэлбэл Путин 2036 он хүртэл буюу 83 нас хүртлээ Орос орныг захирах болж байна.

ОХУ-ын 85 муж, бүс нутгийн нэгээс бусдад нь үндсэн хуулийн өөрчлөлтийг дэмжжээ. Бүх сонгогчдын 78 орчим хувь нь дэмжсэн юм.

Ганцхан Ненецийн Автономит тойргийн 37,490 сонгогчийн 55 гаруй хувь нь эсрэг санал өгсөн байна.

Москвагаас зүүн хойд зүгт 1,600 км зайтай оршдог тундрын энэ бүс нутгийг хөрш Архангельск мужтай нэгтгэх төлөвлөгөө яригдаж эхэлсэн нь ненецчүүдийн Москвагийн эрх баригчдад итгэх итгэлийг сулруулснаас ийм үр дүнд хүргэсэн гэж ажиглагчид дүгнэж байгаа юм.

Ненецийн Автономит тойргийг татан буулгаж, өөр мужтай нэгтгэвэл төв засгийн газраас дэмжлэг авахаа больж, ядуурал нэмэгдэнэ гэсэн айдас иргэдийнх нь дунд байгаа ажээ.

Нэгтгэх төлөвлөгөөг хэрэгжүүлэх санамж бичгийг мужуудын захирагч нар энэ оны тавдугаар сарын 13-нд байгуулсан юм. Уг асуудлаар санал асуулгыг ирэх есдүгээр сард иргэдийн дунд зохион байгуулах гэж байснаа ненецчүүдийн эсэргүүцлийн улмаас цуцалсан байна.

“Хүмүүс үндсэн хуулийн өөрчлөлтийн эсрэг санал өгсөн нь Москвагийн эрх баригчдын анхаарлыг татаж, бид ч гэсэн энд амьдардаг, бидэнд ч бас эрх ашиг байдгийг сануулах зорилготой” гэж Ненецийн бизнес эрхлэгч эмэгтэй Татьяна Антипина хэвлэлд ярьжээ.

Тэрбээр энэ долоо хоногт Москвад очиж, нэгтгэх төлөвлөгөөг эсэргүүцсэн 15,000 хүний гарын үсэгтэй өргөх бичгийг Кремльд гардуулж өгсөн байна.

Кремлийн хэвлэлийн төлөөлөгч Дмитрий Песков “ненецчүүд эсрэг санал өгөх эрхээ эдэлсэн ч “үнэмлэхүй цөөнх” болж байгаа”-г саяхан мэдэгджээ.

Эх сурвалж: Reuters