Өмнөд Солонгосын цагдаа гэмгүй хүнийг 20 жил шоронд хорьсондоо уучлал гуйжээ

Өмнөд Солонгосын түүхэнд гарсан хамгийн дуулиантай цуврал аллагын хэргийн эзнийг олон жилийн дараа цагдаа нар илрүүлсэн билээ.

Ли Чун Жэ гэгч энэ этгээд 1986 оноос хойш таван жилийн хугацаанд Хвасoн хотын ойролцоо 10 эмэгтэйг хүчиндэж, амийг нь бүрэлгэсэн юм. Харамсалтай нь цагдаа нар 57 настай Лиг дөнгөж өнгөрсөн онд орчин үеийн ДНХ шинжилгээний арга техникээр илрүүлж байв.

Жинхэнэ алуурчныг илрүүлэхийн тулд өнгөрсөн хугацаанд 21,000 хүнийг сэжигтнээр шалгаж байжээ.

Ли Чун Жэ бүх 10 хохирогчийн амийг хөнөөснөө хүлээснээс гадна өөр дөрвөн эмэгтэйн амийг хөнөөж, есөн эмэгтэйг хүчиндсэнээ нэмж хүлээсэн байна.

Тэрбээр одоо 1994 онд бэрийгээ хүчиндэж, амийг нь бүрэлгэсэн хэрэгт шийтгүүлж, бүх насаар хоригдох ял эдэлж байгаа юм. 30-аад жилийн өмнө үйлдсэн хэргүүдийнх нь мөрдөн шалгах хугацаа дууссан тул тэр нэмж шийтгүүлэхгүй юм байна.

Өчигдөр Хвасон хотын цагдаагийн газрын дарга Бэ Ён Жү хохирогчдын ар гэрийнхнээс, өнгөрсөн хугацаанд сэжиглэгдэж байсан хүмүүсээс, бас гүтгэгдэж 20 жил хорих ял эдэлсэн нэг хүнээс уучлал гуйжээ.

Цагдаагийн мэдээлэлд дурдагдсан Юн овогтой хүн Хвасоны хэргийн хохирогчдын нэг болох өсвөр насны охиныг хүчиндэж, амийг нь бүрэлгэсэн хэрэгт хилсээр шийтгүүлж, 20 жил шоронд хоригдсон юм байна.

Тэрбээр 2009 онд өршөөлөөр суллагдсан ба өнгөрсөн онд Хвасоны цуврал аллагын хэрэг илэрсний дараа өөрийгөө цагаатгуулахаар шүүхэд ханджээ.

1990-ээд онд Хвасоны хэрэгт сэжиглэгдэн шалгагдаж байсан хүмүүсээс дөрөв нь сэтгэл санааны хямралд орж, амиа хорлосон юм байна.

Тухайн үед Юнд хүчээр хэрэг тулгаж, хүлээлгэсэн найман цагдаагийн ажилтан, прокурорт шийтгэл оноох болсноо Бэ Ён Жү өчигдөр хэвлэлийн хурлын үеэр мэдээлжээ.

“Ли Чун Жэгийн хэргүүдийн хохирогчдоос, тэдний ар гэрийнхнээс, цагдаагийн мөрдлөгийн улмаас хэлмэгдсэн бүх хүмүүсээс, тэдгээрийн дотроос ноён Юнээс би толгой мэхийн уучлал гуйж байна” гэж Бэ Ён Жү өчигдөр мэдэгдсэн юм.

Энэ онд Оскарын шагнал хүртсэн найруулагч Бон Жүн Хо дээрх цуврал аллагын хэрэг дээр сэдэвлэсэн “Memories of Murder” уран сайхны киног бүтээж, 2003 онд дэлгэцэнд гаргаж байжээ.

Эх сурвалж: AFP