Жил бүр $10 тэрбумын үнэтэй ховор металл хог дээр хаягдаж байгааг НҮБ анхааруулжээ

Жил бүр дэлхий даяар $10 тэрбумын үнэтэй алт, цагаан алт зэрэг ховор металл электроникийн хаягдал болж байгааг НҮБ-ын гаргасан шинэ тайланд өгүүлжээ.

НҮБ-ын Global E-waste Monitor тайланд өгүүлснээр 2019 онд дэлхий даяар 54 сая тонн “э-хаягдал” үүссэн нь таван жилийн хугацаанд 21 хувиар өсссөн үзүүлэлт юм байна.

Энэ бол дэлхий дээр амьдарч байгаа эрэгтэй, эмэгтэй, хүүхэд ялгаагүй хүн бүрт 7.3 кг оногдох хэмжээ юм. Гэхдээ электроник хог хаягдлын ихэнх нь өндөр хөгжилтэй орнуудаас үүсч байна.

Ийм төрлийн хог хаягдлын өсөлт дэлхийн хүн амын өсөлтөөс гурав дахин хурдан байгаа юм. 2019 оны хаягдлаас ердөө 17 хувь нь дахин боловсруулагджээ.

Гар утас, компьютерээс эхлээд хөргөгч, индүү зэрэг электроникийн бүтээгдэхүүнүүд хүн төрөлхтөнд томоохон дэвшил авчирсан нь эргэлзээгүй. Гэхдээ нөгөө талаар үйлдвэрлэхэд нь химийн хортой бодис ихээр ашигладаг тул үүссэн хог хаягдал нь хүний эрүүл мэнд, байгаль орчинд хохирол учруулдаг. 

Мөн үйлдвэрлэлийн хэмжээ нь нэмэгдэх тусам түүхий эд олборлолтыг нэмэгдүүлж, байгаль дэлхийг сүйтгэн, цаашлаад уур амьсгалын өөрчлөлтөд нөлөөлж байна.

НҮБ-ын тайланд электроникийн хог хаягдалд зохицуулалт дутагдаж байгааг, бас электроник бүтээгдэхүүнүүд улам бүр засаж сэлбэхэд хэцүү болж, богино хугацаатай хэрэглэгддэг болсныг шүүмжилжээ.

Электрон хог хаягдлыг мэргэжилтнүүд “зайлсхийх бүрэн боломжтой гамшиг” гэж тодорхойлсон байна.

Эх сурвалж: The Guardian