“Замын-Үүд” чөлөөт бүсийн захирагчаар А.Энхзулыг томиллоо

Монгол Улсын Засгийн газрын 2016-2020 оны үйл ажиллагааны хөтөлбөрийн 2.11-д “Чөлөөт бүсүүдийн үйл ажиллагааг эрчимжүүлж, гадаад, дотоодын хөрөнгө оруулалтыг дэмжиж ажиллана” хэмээн заасны дагуу чөлөөт бүсүүд, тэр дундаа “Замын-Үүд” чөлөөт бүсийн үйл ажиллагааг эрчимжүүлэх ажлыг эхлүүлсэн байдаг. “Замын-Үүд” чөлөөт бүсийн ажил эрчимжсэнээр БНХАУ болон Зүүн хойд Азийн орнуудын зах зээлд нэвтрэн, нарийн мэргэжлийн шинэ ажлын байрууд олноор бий болох юм. Түүнчлэн технологи шилжүүлэх үйл ажиллагааг эрчимжүүлэх үүднээс гадаадын шууд хөрөнгө оруулалтыг татаж, уламжлалт бус бараа бүтээгдэхүүн үйлдвэрлэх бололцоог дотоодын бизнес эрхлэгчдэд олгох боломж бүрдсэн. Үүгээр ч зогсохгүй эдийн засгийн чөлөөт бүсийг хөгжүүлэхэд шаардлагатай зам тээврийн сүлжээ, инженерийн дэд бүтэц бий болж, Монгол Улсад аялал жуулчлалыг хөгжүүлэхэд чухал түлхэц болох юм. Тус Замын-Үүд бүсийн захирагчаар МАН-ын Хэвлэл мэдээллийн газрын даргаар ажиллаж байсан А.Энхзулыг томиллоо.

Монгол Улсад  чөлөөт бүс байгуулах анхны үзэл баримтлал 1995 онд гарсан. Харин “Чөлөөт бүс байгуулах тухай хууль”-ийг 2002 онд баталж, 2015 онд шинэчлэн баталсан байдаг. Чөлөөт бүс дотоодын нийт бүтээгдэхүүнийг 20-30 хувиар нэмэгдүүлэх боломжтой сектор бөгөөд манай улсын хувьд Алтанбулаг, Цагааннуур, Замын-Үүд гэсэн гурван чөлөөт бүс үйл ажиллагаа явуулж байна.