Вакциныхаа хоёрдугаар тунг хийлгэвэл урамшуулна.

Сүүлийн өдрүүдэд вакцинд хамрагдах иргэдийн тоо буурсан үзүүлэлттэй байсан. Иймд Засгийн газраас вакцинжуулалтын ажлыг эрчимжүүлэх үүднээс тодорхой шийдвэрүүдийг гаргасаар байна. Тухайлбал, вакцины хоёр тундаа хамрагдсан иргэддээ 50 мянган төгрөгийн урамшуулал олгохоор шийдвэрлэсэн явдал юм. Энэ бол вакцинжуулалтын эрч идэвхийг нэмэгдүүлэх нэг том хөшүүрэг гэдгийг албаныхан хэлж байлаа.

Нийслэлд хүнсний талон авдаг 47 мянган насанд хүрсэн, вакцин хийлгэх ёстой иргэн байдаг. Үүний 29 мянга нь вакцины нэгдүгээр тундаа ч хамрагдаагүй байна. Мөн Улаанбаатарт төрөл бүрийн халамжид хамрагддаг 211 мянган иргэн байна. Үүний 81 мянган иргэн нь вакциндаа хамрагдаагүй байгаа юм. Иймээс ирэх саруудад бүх төрлийн халамж, хүнсний талоныг вакцинжуулалтад хамрагдсан эсэхээс шалтгаалж олгоно. Вакцинжуулалтад бүрэн хамрагдсан иргэдийн дархлааг хадгалах, сэргээх зорилгоор 50 мянган төгрөгийн витаминжуулалтын багц бэлдэж байсан. Гэхдээ үүнийг вакцинд хамрагдсан иргэдийг урамшуулах хэлбэрээр бэлэн мөнгөөр тооцож олгох шийдвэр гаргалаа. Иймээс ард иргэд нийгмийн хариуцлагаа ухамсарлан гэр бүл, хайртай хүмүүсийнхээ төлөө вакцинжуулалтад хамрагдах хэрэгтэй байна гэдгийг сангийн сайд Б.Жавхлан онцолсон юм.